usne KHud phone pe ye mujhse kaha achchha tha

us ne ḳhud phone pe ye mujh se kahā achchhā thā

dāġh-e-bosa vo jo kañdhe pe milā achchhā thā

pyaas ke haq meñ mire hoñT duā karte the

pyaas kī chaah meñ ab jo bhī milā achchhā thā

niiñd bal khātī huī aa.ī thī nāgin kī tarah

kaaT bhī letī agar vo to baḌā achchhā thā

yuuñ to kitne hī ḳhudā aa.e mire raste meñ

maiñ ne ḳhud hī jo banāyā thā ḳhudā achchhā thā

vo jo nuqsān kī mānind mujhe lagtā hai

sach to ye hai ki vahī ek nafā achchhā thā

dil kī tārīk sī galiyoñ meñ tumhārī aahaT

aur aahaT se jo ik phuul khilā achchhā thā

jism ko yaad kiyā kartī hai ab ruuh mirī

aur kahtī hai ki vo baaġh amā achchhā thā

log kahte haiñ ki vo shaḳhs burā thā lekin

dil to kahtā hai ki vo shaḳhs baḌā achchhā thā

us ne KHud phone pe ye mujh se kaha achchha tha

dagh-e-bosa wo jo kandhe pe mila achchha tha

pyas ke haq mein mere honT dua karte the

pyas ki chah mein ab jo bhi mila achchha tha

nind bal khati hui aai thi nagin ki tarah

kaT bhi leti agar wo to baDa achchha tha

yun to kitne hi KHuda aae mere raste mein

main ne KHud hi jo banaya tha KHuda achchha tha

wo jo nuqsan ki manind mujhe lagta hai

sach to ye hai ki wahi ek nafa achchha tha

dil ki tarik si galiyon mein tumhaari aahaT

aur aahaT se jo ek phul khila achchha tha

jism ko yaad kiya karti hai ab ruh meri

aur kahti hai ki wo bagh ama achchha tha

log kahte hain ki wo shaKHs bura tha lekin

dil to kahta hai ki wo shaKHs baDa achchha tha