usne ruKH pe zulfon ko is tarah bikhera hai

us ne ruḳh pe zulfoñ ko is tarah bikherā hai

ik taraf ujālā hai ik taraf añdherā hai

husn ne taḳhayyul par nuur kyā bikherā hai

'ishq kī nigāhoñ meñ duur tak saverā hai

zid na kījiye ham se ham ko saath le liije

yaañ ke log vahshī haiñ shahr ye luTerā hai

kal jo mujh se barham the sochtā huuñ jaane kyoñ

aaj un ke hoñToñ par naam sirf merā hai

gesuoñ se rakhnā hai rabt husn vāloñ ke

nāginoñ se khele hai 'ishq bhī saperā hai

sāġharoñ kī gardish ko aur tez kar Daalo

mujh ko is zamāne kī gardishoñ ne gherā hai

jis jagah ki luTte haiñ qāfile mohabbat ke

ai 'nazar' suno apnā us jagah baserā hai

us ne ruKH pe zulfon ko is tarah bikhera hai

ek taraf ujala hai ek taraf andhera hai

husn ne taKHayyul par nur kya bikhera hai

'ishq ki nigahon mein dur tak sawera hai

zid na kijiye hum se hum ko sath le lije

yan ke log wahshi hain shahr ye luTera hai

kal jo mujh se barham the sochta hun jaane kyon

aaj un ke honTon par nam sirf mera hai

gesuon se rakhna hai rabt husn walon ke

naginon se khele hai 'ishq bhi sapera hai

sagharon ki gardish ko aur tez kar Dalo

mujh ko is zamane ki gardishon ne ghera hai

jis jagah ki luTte hain qafile mohabbat ke

ai 'nazar' suno apna us jagah basera hai