usne wo jal bichhae hain ki ji jaanta hai

us ne vo jaal bichhā.e haiñ ki jī jāntā hai

sabz baaġh aise dikhā.e haiñ ki jī jāntā hai

naaz vo ham ne uThā.e haiñ ki jī jāntā hai

kaam vo karke dikhā.e haiñ ki jī jāntā hai

dekhne vāloñ ko phande meñ phañsāne ke liye

aise bal zulf ne khaa.e haiñ ki jī jāntā hai

mere hote hue aġhyār pe ye lutf-o-karam

us ne vo tiir chalā.e haiñ ki jī jāntā hai

husn kī us ke ho tārīf kahāñ tak mujh se

us ne ausāf vo paa.e haiñ ki jī jāntā hai

yuuñ to aane ko vo mahfil meñ ka.ī baar aa.e

aaj is shaan se aa.e haiñ ki jī jāntā hai

us se milne ke liye kyā kyā jatan ham ne kiye

vo vo ehsān uThā.e haiñ ki jī jāntā hai

Tālne ke liye us shoḳh ne kyā kyā na kiyā

rāste itne batā.e haiñ ki jī jāntā hai

daaġh ke rang meñ 'ḳhāvar' ne ġhazal ḳhuub kahī

vo vo ash.ār sunā.e haiñ ki jī jāntā hai

us ne wo jal bichhae hain ki ji jaanta hai

sabz bagh aise dikhae hain ki ji jaanta hai

naz wo hum ne uThae hain ki ji jaanta hai

kaam wo karke dikhae hain ki ji jaanta hai

dekhne walon ko phande mein phansane ke liye

aise bal zulf ne khae hain ki ji jaanta hai

mere hote hue aghyar pe ye lutf-o-karam

us ne wo tir chalae hain ki ji jaanta hai

husn ki us ke ho tarif kahan tak mujh se

us ne ausaf wo pae hain ki ji jaanta hai

yun to aane ko wo mahfil mein kai bar aae

aaj is shan se aae hain ki ji jaanta hai

us se milne ke liye kya kya jatan hum ne kiye

wo wo ehsan uThae hain ki ji jaanta hai

Talne ke liye us shoKH ne kya kya na kiya

raste itne batae hain ki ji jaanta hai

dagh ke rang mein 'KHawar' ne ghazal KHub kahi

wo wo ashaar sunae hain ki ji jaanta hai