us nigah-e-naz ne yun raat-bhar tajsim ki

us nigāh-e-nāz ne yuuñ rāt-bhar tajsīm kī

sab charāġhoñ meñ barābar raushnī taqsīm kī

raat pīchhe paḌ ga.ī thī ḳhauf ke saa.e liye

ḳhvāb se aage nikal kar vaqt meñ tarmīm kī

aa.ina ho jā.egā ye dasht mujh par ek din

girheñ khultī jā rahī haiñ ahsan-e-taqvīm kī

donoñ hī aa kar alif kī raushnī meñ zam huiiñ

ik tajallī laam kī aur ik tajallī miim kī

shahd kā bhī zikr ho saktā thā hone ko magar

us ke lahje ke mutābiq baat chheḌī niim kī

maiñ hī thā apne muqābil ḳhvāhishoñ kī Dor meñ

hārnā mushkil lagā so jiit hī taslīm kī

dost lekin tujh ko ye izzat na raas aa.ī kabhī

maiñ ne apne aap se baḌh kar tirī takrīm kī

shaam hote hī charāġhoñ ko sajāyā taaq meñ

saarā din so kar guzārā raat kī tāzīm kī

umr-bhar sūraj ke aage haath phailā.e magar

ik sitāre ne mujhe ye raushnī ta.alīm kī

khīñch kar aflāk pe ik surma.ī raushan lakīr

chāñd ne sūrat badal Daalī hamārī theem kī

maiñ ne 'zeb' us ko mohabbat meñ kahā thā mujh se mil

us ne merī baat kī kitnī ġhalat tafhīm kī

us nigah-e-naz ne yun raat-bhar tajsim ki

sab charaghon mein barabar raushni taqsim ki

raat pichhe paD gai thi KHauf ke sae liye

KHwab se aage nikal kar waqt mein tarmim ki

aaina ho jaega ye dasht mujh par ek din

girhen khulti ja rahi hain ahsan-e-taqwim ki

donon hi aa kar alif ki raushni mein zam huin

ek tajalli lam ki aur ek tajalli mim ki

shahd ka bhi zikr ho sakta tha hone ko magar

us ke lahje ke mutabiq baat chheDi nim ki

main hi tha apne muqabil KHwahishon ki Dor mein

haarna mushkil laga so jit hi taslim ki

dost lekin tujh ko ye izzat na ras aai kabhi

main ne apne aap se baDh kar teri takrim ki

sham hote hi charaghon ko sajaya taq mein

sara din so kar guzara raat ki tazim ki

umr-bhar suraj ke aage hath phailae magar

ek sitare ne mujhe ye raushni talim ki

khinch kar aflak pe ek surmai raushan lakir

chand ne surat badal Dali hamari theem ki

main ne 'zeb' us ko mohabbat mein kaha tha mujh se mil

us ne meri baat ki kitni ghalat tafhim ki