us ruKH pe phir gulab se khilne lage to hain

us ruḳh pe phir gulāb se khilne lage to haiñ

ai chashm-e-ishtiyāq tire din phire to haiñ

kuchh ehtimām-e-raunaq-e-mai-ḳhāna hai zarūr

ThanDī havā chalī to hai bādal ghire to haiñ

lo ab to aa.ī manzil-e-jānāñ se bū-e-ḳhush

kuchh Thokareñ lagī to haiñ kāñTe chubhe to haiñ

vo kar ke apne chāhne vāloñ kā qatl-e-ām

ab kuchh pasījne to lage haiñ dabe to haiñ

gulshan kī ḳhair ho to gavārā qafas hameñ

uḌtī sī hai ḳhabar ki na.e gul khile to haiñ

takfīr se na jis kī bachā ek riñd bhī

is zohd se bhī makr ke parde uThe to haiñ

apne niyāz-mand ke sidq-o-safā ko vo

yuuñ mānte nahīñ haiñ magar jānte to haiñ

phir masnad-e-qazā pe huā zulm jalva-gar

ta.azīr-e-jurm ishq ke sāmāñ hue to haiñ

is daur ke zalām meñ sūraj bhī gum sahī

saath apne dāġh-hā-e-kuhan ke diye to haiñ

us ruKH pe phir gulab se khilne lage to hain

ai chashm-e-ishtiyaq tere din phire to hain

kuchh ehtimam-e-raunaq-e-mai-KHana hai zarur

ThanDi hawa chali to hai baadal ghire to hain

lo ab to aai manzil-e-jaanan se bu-e-KHush

kuchh Thokaren lagi to hain kanTe chubhe to hain

wo kar ke apne chahne walon ka qatl-e-am

ab kuchh pasijne to lage hain dabe to hain

gulshan ki KHair ho to gawara qafas hamein

uDti si hai KHabar ki nae gul khile to hain

takfir se na jis ki bacha ek rind bhi

is zohd se bhi makr ke parde uThe to hain

apne niyaz-mand ke sidq-o-safa ko wo

yun mante nahin hain magar jaante to hain

phir masnad-e-qaza pe hua zulm jalwa-gar

tazir-e-jurm ishq ke saman hue to hain

is daur ke zalam mein suraj bhi gum sahi

sath apne dagh-ha-e-kuhan ke diye to hain