us se alag ho aisi meri zat hi nahin

us se alag ho aisī mirī zaat hī nahīñ

merā nahīñ hai vo to koī baat hī nahīñ

auroñ se mil ke bachtā hai kuchh vaqt hī kahāñ

hotī hai ḳhud se merī mulāqāt hī nahīñ

jumbish hai tan-badan meñ dhaḌaktā nahīñ hai dil

yuuñ ho ga.e mashīnī ki jazbāt hī nahīñ

mā'dūd-e-chand haiñ ye magar qad alag alag

apnī to uñgliyoñ meñ musāvāt hī nahīñ

aisī jagah bhī hai ki jalāte nahīñ charāġh

jaise vahāñ pe aatī kabhī raat hī nahīñ

rahtī hai pyaas kab jo nazar se nazar mile

āñkhoñ se baḌh ke koī ḳharābāt hī nahīñ

ai 'badr' shā'irāna ta'allī hai ḳhuub shai

aisā ye dā'vā hai ki jise maat hī nahīñ

us se alag ho aisi meri zat hi nahin

mera nahin hai wo to koi baat hi nahin

auron se mil ke bachta hai kuchh waqt hi kahan

hoti hai KHud se meri mulaqat hi nahin

jumbish hai tan-badan mein dhaDakta nahin hai dil

yun ho gae mashini ki jazbaat hi nahin

ma'dud-e-chand hain ye magar qad alag alag

apni to ungliyon mein musawat hi nahin

aisi jagah bhi hai ki jalate nahin charagh

jaise wahan pe aati kabhi raat hi nahin

rahti hai pyas kab jo nazar se nazar mile

aankhon se baDh ke koi KHarabaat hi nahin

ai 'badr' sha'irana ta'alli hai KHub shai

aisa ye da'wa hai ki jise mat hi nahin