us se bichhDun bhi to itni to KHushi rahti hai

us se bichhḌūñ bhī to itnī to ḳhushī rahtī hai

phir mulāqāt kī ummīd banī rahtī hai

barsoñ in āñkhoñ meñ barsāt kā mausam Thahrā

ab bhī is kamre meñ thoḌī sī namī rahtī hai

dekh saktā hai unheñ kaun ki un āñkhoñ meñ

raushnī jaisī koī chiiz bharī rahtī hai

in daraḳhtoñ meñ koī phal to nahīñ aate haiñ

in daraḳhtoñ kī magar chhāñv ghanī rahtī hai

maiñ ne hī 'ishq kī afvāh uḌaa.ī hai huzūr

baat jo sāmne rahtī hai dabī rahtī hai

ab bhī is ghar meñ tire jaane kā ġham hai zinda

ab bhī ik kone meñ ik sham' bujhī rahtī hai

dil meñ ik peḌ lagā rakkhā hai maiñ ne jis meñ

terī ummīd kī ik shāḳh jhukī rahtī hai

ai mirī zindagī tū jitnī bhī bharpā.ī kare

sab ke hote hue ik us kī kamī rahtī hai

us se bichhDun bhi to itni to KHushi rahti hai

phir mulaqat ki ummid bani rahti hai

barson in aankhon mein barsat ka mausam Thahra

ab bhi is kamre mein thoDi si nami rahti hai

dekh sakta hai unhen kaun ki un aankhon mein

raushni jaisi koi chiz bhari rahti hai

in daraKHton mein koi phal to nahin aate hain

in daraKHton ki magar chhanw ghani rahti hai

main ne hi 'ishq ki afwah uDai hai huzur

baat jo samne rahti hai dabi rahti hai

ab bhi is ghar mein tere jaane ka gham hai zinda

ab bhi ek kone mein ek sham' bujhi rahti hai

dil mein ek peD laga rakkha hai main ne jis mein

teri ummid ki ek shaKH jhuki rahti hai

ai meri zindagi tu jitni bhi bharpai kare

sab ke hote hue ek us ki kami rahti hai