us se gila karun ki use bhul jaun main

us se gila karūñ ki use bhuul jā.ūñ maiñ

vo vaqt aa paḌā hai ki sab kuchh gañvā.ūñ maiñ

kis ko dikhā.ūñ apnī shab-e-tār-tār ko

saaya bhī koī ho to use kuchh batā.ūñ maiñ

maġhrūr ho gayā hai mujhe mujh se chhīn kar

ai kaash us ko us se kabhī chhīn lā.ūñ maiñ

qisse sunā rahā hai mirī bevafā.ī ke

us kī tarah se ḳhud ko kabhī āzmā.ūñ maiñ

koī nishāñ mile na kisī mauj ko kabhī

gahre samundaroñ meñ kahīñ Duub jā.ūñ maiñ

ik baar mujh ko uTh ke gale se lagā bhī le

kis ko ḳhabar hai phir yahāñ aa.uuñ na aa.uuñ maiñ

mahv-e-tilism-e-shoḳhī-e-reg-e-ravāñ hai dil

ab baiTh ke kahāñ tirī sūrat banā.ūñ maiñ

hairān huuñ maiñ apnī qabā ko utaar kar

zaḳhmoñ ke is dayār meñ kis ko bulā.ūñ maiñ

maiñ ḳhaak ho chukā huuñ ḳhud apnī hī aag meñ

us ke lahu kī aag kahāñ se bujhā.ūñ maiñ

jī chāhtā hai ghūmūñ maiñ 'ajmal' ḳhalā-ḳhalā

apne badan ke paar kahīñ muskurā.ūñ maiñ

us se gila karun ki use bhul jaun main

wo waqt aa paDa hai ki sab kuchh ganwaun main

kis ko dikhaun apni shab-e-tar-tar ko

saya bhi koi ho to use kuchh bataun main

maghrur ho gaya hai mujhe mujh se chhin kar

ai kash us ko us se kabhi chhin laun main

qisse suna raha hai meri bewafai ke

us ki tarah se KHud ko kabhi aazmaun main

koi nishan mile na kisi mauj ko kabhi

gahre samundaron mein kahin Dub jaun main

ek bar mujh ko uTh ke gale se laga bhi le

kis ko KHabar hai phir yahan aaun na aaun main

mahw-e-tilism-e-shoKHi-e-reg-e-rawan hai dil

ab baiTh ke kahan teri surat banaun main

hairan hun main apni qaba ko utar kar

zaKHmon ke is dayar mein kis ko bulaun main

main KHak ho chuka hun KHud apni hi aag mein

us ke lahu ki aag kahan se bujhaun main

ji chahta hai ghumun main 'ajmal' KHala-KHala

apne badan ke par kahin muskuraun main