us taraf aankh ke raste se nikale dhoke

us taraf aañkh ke raste se nikāle dhoke

is taraf dil ne hasīñ phir na.e paale dhoke

kar diyā pahle sarāboñ ke havāle aur phir

maiñ ne pyāse ko pukārā ki sañbhāle dhoke

har qadam par rahā bedār ye nā-bīnā-pan

khā ga.e yaar magar dekhne vaale dhoke

ek do ho to yaqīñ jaan ke kar luuñ lekin

yaar tū ne to har ik baat meñ Daale dhoke

raqs karte haiñ añdheroñ meñ to 'uryāñ shab bhar

oḌh kar rahte haiñ din bhar hī ujāle dhoke

dil ke haq meñ to vo hī ek bashar daana hai

muuñd kar aañkh jo siine se lagā le dhoke

reza-reza hai mirī pyaas yaqīnī lekin

qatra-qatra ye tire saare piyāle dhoke

us taraf aankh ke raste se nikale dhoke

is taraf dil ne hasin phir nae pale dhoke

kar diya pahle sarabon ke hawale aur phir

main ne pyase ko pukara ki sanbhaale dhoke

har qadam par raha bedar ye na-bina-pan

kha gae yar magar dekhne wale dhoke

ek do ho to yaqin jaan ke kar lun lekin

yar tu ne to har ek baat mein Dale dhoke

raqs karte hain andheron mein to 'uryan shab bhar

oDh kar rahte hain din bhar hi ujale dhoke

dil ke haq mein to wo hi ek bashar dana hai

mund kar aankh jo sine se laga le dhoke

reza-reza hai meri pyas yaqini lekin

qatra-qatra ye tere sare piyale dhoke