us taraf ahl-e-hasad hain jo bujhate hain charagh

us taraf ahl-e-hasad haiñ jo bujhāte haiñ charāġh

is taraf ham haiñ charāġhoñ se jalāte haiñ charāġh

chain māñ-bāp kī āñkhoñ ko nahīñ aatā hai

jab talak lauT ke ghar meñ nahīñ aate haiñ charāġh

ye taraqqī hai ki tahzīb kā girtā me'yār

āñkheñ is daur meñ sūraj se milāte haiñ charāġh

us taraf vo bhī pareshāñ haiñ mohabbat kar ke

raat bhar ham bhī jalāte haiñ bujhāte haiñ charāġh

maiñ za.īfī ke añdheroñ meñ paḌā huuñ apne

kab talak dekho mirā saath nibhāte haiñ charāġh

sab kī fitrat meñ nahīñ hotā ujāle karnā

apne ghar ko bhī kabhī aag lagāte haiñ charāġh

ho ga.ī ḳhaak mohabbat kī kahānī lekin

aaj bhī ham tirī yādoñ ke jalāte haiñ charāġh

ham se aatī nahīñ nafrat kī tijārat ai 'farāz'

ham suḳhanvar haiñ mohabbat ke jalāte haiñ charāġh

us taraf ahl-e-hasad hain jo bujhate hain charagh

is taraf hum hain charaghon se jalate hain charagh

chain man-bap ki aankhon ko nahin aata hai

jab talak lauT ke ghar mein nahin aate hain charagh

ye taraqqi hai ki tahzib ka girta me'yar

aankhen is daur mein suraj se milate hain charagh

us taraf wo bhi pareshan hain mohabbat kar ke

raat bhar hum bhi jalate hain bujhate hain charagh

main zaifi ke andheron mein paDa hun apne

kab talak dekho mera sath nibhate hain charagh

sab ki fitrat mein nahin hota ujale karna

apne ghar ko bhi kabhi aag lagate hain charagh

ho gai KHak mohabbat ki kahani lekin

aaj bhi hum teri yaadon ke jalate hain charagh

hum se aati nahin nafrat ki tijarat ai 'faraaz'

hum suKHanwar hain mohabbat ke jalate hain charagh