us zulf se dil ho kar aazad bahut roya

us zulf se dil ho kar āzād bahut royā

ye silsila-e-ulfat kar yaad bahut royā

rahm us ko na thā hargiz har chand bahāl-e-sag

us kūche meñ maiñ kar kar fariyād bahut royā

mazlūmī mirī aur zulm dekh us but-e-kāfir kā

rahm aayā sitam ke ta.iiñ be-dād bahut royā

dil ġham se na ho ḳhālī rone se mirā lekin

tā ho mire rone se vo shaad bahut royā

is ishq kī majbūrī nāseh pe khulī jab se

kar man.a-e-mohabbat kā irshād bahut royā

dekhī na ḳhudā-tarsī ik gabr o musalmāñ se

har ik se talab kar kar maiñ daad bahut royā

anjām mohabbat kā būjhā thā magar us ko

jab dil lagā shīrīñ se farhād bahut royā

hai tāza-giraftāroñ kī fariyād ko kyā riqqat

shab naala mirā sun kar sayyād bahut royā

sañgīñ-dilī us but kī maiñ jis se kahī 'hasrat'

har-chand dil us kā thā faulād bahut royā

us zulf se dil ho kar aazad bahut roya

ye silsila-e-ulfat kar yaad bahut roya

rahm us ko na tha hargiz har chand bahaal-e-sag

us kuche mein main kar kar fariyaad bahut roya

mazlumi meri aur zulm dekh us but-e-kafir ka

rahm aaya sitam ke tain be-dad bahut roya

dil gham se na ho KHali rone se mera lekin

ta ho mere rone se wo shad bahut roya

is ishq ki majburi naseh pe khuli jab se

kar mana-e-mohabbat ka irshad bahut roya

dekhi na KHuda-tarsi ek gabr o musalman se

har ek se talab kar kar main dad bahut roya

anjam mohabbat ka bujha tha magar us ko

jab dil laga shirin se farhad bahut roya

hai taza-giraftaron ki fariyaad ko kya riqqat

shab nala mera sun kar sayyaad bahut roya

sangin-dili us but ki main jis se kahi 'hasrat'

har-chand dil us ka tha faulad bahut roya