use ahd-e-mohabbat se mukar jaane ki jaldi thi

use 'ahd-e-mohabbat se mukar jaane kī jaldī thī

thamī bārish to dariyā ko utar jaane kī jaldī thī

bichhaḌ kar us ko bhī shāyad na.ī duniyā basānī thī

mujhe bhī TuuT kar ḳhud hī bikhar jaane kī jaldī thī

sabab koī to batlā do yuuñ us ke duur jaane kā

use mujh se judā ho kar kidhar jaane kī jaldī thī

ye chāhat rind kī thī raat bhar piitā rahūñ lekin

udhar saaqī ko bhī to apne ghar jaane kī jaldī thī

use bhī shauq thā har baat par nuqta batāne kā

mujhe bhī tanz sun sun kar nikhar jaane kī jaldī thī

madad ke vāste ghāyal kī ruktā kaun saḌkoñ par

vahāñ har shaḳhs ko bach kar guzar jaane kī jaldī thī

tabīb-e-shahr tere in davā-ḳhānoñ se ghabrā kar

ġharīb-e-shahr ko bistar pe mar jaane kī jaldī thī

tavaqqo' hī na kī marham kī un se maiñ ne bhī 'sāhil'

mire zaḳhmoñ ko to aise hī bhar jaane kī jaldī thī

use 'ahd-e-mohabbat se mukar jaane ki jaldi thi

thami barish to dariya ko utar jaane ki jaldi thi

bichhaD kar us ko bhi shayad nai duniya basani thi

mujhe bhi TuT kar KHud hi bikhar jaane ki jaldi thi

sabab koi to batla do yun us ke dur jaane ka

use mujh se juda ho kar kidhar jaane ki jaldi thi

ye chahat rind ki thi raat bhar pita rahun lekin

udhar saqi ko bhi to apne ghar jaane ki jaldi thi

use bhi shauq tha har baat par nuqta batane ka

mujhe bhi tanz sun sun kar nikhar jaane ki jaldi thi

madad ke waste ghayal ki rukta kaun saDkon par

wahan har shaKHs ko bach kar guzar jaane ki jaldi thi

tabib-e-shahr tere in dawa-KHanon se ghabra kar

gharib-e-shahr ko bistar pe mar jaane ki jaldi thi

tawaqqo' hi na ki marham ki un se main ne bhi 'sahil'

mere zaKHmon ko to aise hi bhar jaane ki jaldi thi