use jhukna paDa uski anaon par zawal aaya

use jhuknā paḌā us kī anāoñ par zavāl aayā

tirī ḳhātir kisī ḳhud.dār ke lab par savāl aayā

kisī ne mīThe paanī ke ghaḌoñ ko phoḌnā chāhā

kuñvārī chhātiyoñ vaalī ke chehre par jalāl aayā

ḳhudā-e-ahsan-e-taqvīm par kuchh uñgliyāñ uTThīñ

jab ik ḳhvāja-sarā ko baap banñe kā ḳhayāl aayā

ye gadle pāniyoñ meñ qaid kar deñge kahīñ chhup jā

kahīñ chhup jā ai merī jal-parī vo dekh jaal aayā

du'ā māñgī tire joban ko rab tābindagī baḳhshe

hamāre sar meñ pahlī baar jab chāñdī kā baal aayā

mire andar ke hañste khelte mā'sūm bachche par

tire tark-e-ta'alluq se yatīmī kā vabāl aayā

use jhukna paDa us ki anaon par zawal aaya

teri KHatir kisi KHuddar ke lab par sawal aaya

kisi ne miThe pani ke ghaDon ko phoDna chaha

kunwari chhatiyon wali ke chehre par jalal aaya

KHuda-e-ahsan-e-taqwim par kuchh ungliyan uTThin

jab ek KHwaja-sara ko bap banne ka KHayal aaya

ye gadle paniyon mein qaid kar denge kahin chhup ja

kahin chhup ja ai meri jal-pari wo dekh jal aaya

du'a mangi tere joban ko rab tabindagi baKHshe

hamare sar mein pahli bar jab chandi ka baal aaya

mere andar ke hanste khelte ma'sum bachche par

tere tark-e-ta'alluq se yatimi ka wabaal aaya