use jine ka lalach hai na wo marne se Darta hai

use jiine kā lālach hai na vo marne se Dartā hai

to kyā ye shaḳhs bhī gum-nāmiyoñ kī maut martā hai

ajab vīrāni-e-dil hai sisaktā hai vahāñ koī

ab aise bahr-e-tanhā.ī se vo kis paar utartā hai

vahāñ kis kī nazar jaatī hai ik do chaar kāñToñ par

jahāñ ik peḌ jo phūloñ ke gahnoñ se sañvartā hai

hisār-e-lams kī lazzat meñ khoyā hai badan us kā

ye qaidī kyā kabhī is jaal se bach kar guzartā hai

ajab hai ek sang-e-be-navā sī dostī us kī

na ye is se mukartā hai na vo us ko akhartā hai

vo barg-e-be-shajar apne qabīle se judā ho kar

havāoñ ke thapeḌoñ se laraztā aur bikhartā hai

abhī tak to sag-e-iz.hār vo mujh par nahīñ chhoḌā

mirī ārā.ish-e-guftār ke nashtar se Dartā hai

ye mushkil baat bhī lekin baḌā āsān nusḳha bhī

nahīñ nafrat kisī se bhī sabhī se pyaar kartā hai

use jine ka lalach hai na wo marne se Darta hai

to kya ye shaKHs bhi gum-namiyon ki maut marta hai

ajab virani-e-dil hai sisakta hai wahan koi

ab aise bahr-e-tanhai se wo kis par utarta hai

wahan kis ki nazar jati hai ek do chaar kanTon par

jahan ek peD jo phulon ke gahnon se sanwarta hai

hisar-e-lams ki lazzat mein khoya hai badan us ka

ye qaidi kya kabhi is jal se bach kar guzarta hai

ajab hai ek sang-e-be-nawa si dosti us ki

na ye is se mukarta hai na wo us ko akharta hai

wo barg-e-be-shajar apne qabile se juda ho kar

hawaon ke thapeDon se larazta aur bikharta hai

abhi tak to sag-e-izhaar wo mujh par nahin chhoDa

meri aaraish-e-guftar ke nashtar se Darta hai

ye mushkil baat bhi lekin baDa aasan nusKHa bhi

nahin nafrat kisi se bhi sabhi se pyar karta hai