use kah do hawadis ke bichhe hain jal saDkon par

use kah do havādis ke bichhe haiñ jaal saḌkoñ par

chalā kartā hai jo har dam ghamanDī chaal saḌkoñ par

agar maslak ke jhagḌoñ ne masājid baañT rakkhī haiñ

to phir bahr-e-ḳhudā apne musalle Daal saḌkoñ par

koī signal ke vaqfe tak bhī rukne ko nahīñ raazī

gañvā detā hai koī hañs ke sāloñ-sāl saḌkoñ par

mashīneñ gāḌiyāñ hī ghūmtī haiñ rāt-din yaaro

hamāre daur meñ hai aadmī kā kaal saḌkoñ par

bigaḌ jaatī hai jab taqdīr kī aur vaqt kī gaaḌī

utar aate haiñ sultāñ ban ke phir kangāl saḌkoñ par

kuñvārī koī machhlī shab meñ tanhā ghar se na nikle

ki shab meñ phirte haiñ bhūke ka.ī ghaḌiyāl saḌkoñ par

nahīñ gar naam merā na sahī par kam se kam ye ho

mirī ġhazleñ chaleñ us ke laboñ kī laal saḌkoñ par

chaman kī samt jaatī titliyāñ rah se bhaTak jaa.eñ

vo lahrā de jo gul jaise mahakte baal saḌkoñ par

'nabīl' is tarah chimTī hai kisī kī yaad is dil se

jamī rahtī hai jaise gard kī ik shaal saḌkoñ par

use kah do hawadis ke bichhe hain jal saDkon par

chala karta hai jo har dam ghamanDi chaal saDkon par

agar maslak ke jhagDon ne masajid banT rakkhi hain

to phir bahr-e-KHuda apne musalle Dal saDkon par

koi signal ke waqfe tak bhi rukne ko nahin raazi

ganwa deta hai koi hans ke salon-sal saDkon par

mashinen gaDiyan hi ghumti hain raat-din yaro

hamare daur mein hai aadmi ka kal saDkon par

bigaD jati hai jab taqdir ki aur waqt ki gaDi

utar aate hain sultan ban ke phir kangal saDkon par

kunwari koi machhli shab mein tanha ghar se na nikle

ki shab mein phirte hain bhuke kai ghaDiyal saDkon par

nahin gar nam mera na sahi par kam se kam ye ho

meri ghazlen chalen us ke labon ki lal saDkon par

chaman ki samt jati titliyan rah se bhaTak jaen

wo lahra de jo gul jaise mahakte baal saDkon par

'nabil' is tarah chimTi hai kisi ki yaad is dil se

jami rahti hai jaise gard ki ek shaal saDkon par