use kaho ki mere samne Thahar jae

use kaho ki mire sāmne Thahar jaa.e

bas itnī der ki mahshar kā din guzar jaa.e

kabhī huā hai ki shab ruk sake ba-vaqt-e-sahar

ki phuul qatl karo aur bahār mar jaa.e

maiñ chāhtā huuñ koī aisā saaz phūñk ab ke

mirā vujūd mire sāmne bikhar jaa.e

tumhārī yaad meñ Dūbūñ to hashr se niklūñ

yahī tarīqa hai mumkin hai kaam kar jaa.e

nazar nazar meñ gaḌī hai to saañs chal rahī hai

palak jhapakne meñ ye zindagī guzar jaa.e

birājmān haiñ mujh jaise rind raat ga.e

ki bazm-e-sāqī sajī ho to kaun ghar jaa.e

sirāt kā hai ye e'lān koī kalma-go

'alī kā paas liye aa.e aur guzar jaa.e

tavīl itnā hai ashkoñ kā silsila 'shāhid'

agar maiñ aañkh uñDelūñ to 'umr bhar jaa.e

use kaho ki mere samne Thahar jae

bas itni der ki mahshar ka din guzar jae

kabhi hua hai ki shab ruk sake ba-waqt-e-sahar

ki phul qatl karo aur bahaar mar jae

main chahta hun koi aisa saz phunk ab ke

mera wujud mere samne bikhar jae

tumhaari yaad mein Dubun to hashr se niklun

yahi tariqa hai mumkin hai kaam kar jae

nazar nazar mein gaDi hai to sans chal rahi hai

palak jhapakne mein ye zindagi guzar jae

birajman hain mujh jaise rind raat gae

ki bazm-e-saqi saji ho to kaun ghar jae

siraat ka hai ye e'lan koi kalma-go

'ali ka pas liye aae aur guzar jae

tawil itna hai ashkon ka silsila 'shahid'

agar main aankh unDelun to 'umr bhar jae