use KHud ko badal lena gawara bhi nahin hota

use ḳhud ko badal lenā gavāra bhī nahīñ hotā

hamārā aisī duniyā meñ guzāra bhī nahīñ hotā

hameñ is moḌ par le aate haiñ ye ḳhuun ke rishte

ki jiine ke 'alāva aur chāra bhī nahīñ hotā

ye saare chāñd sūraj un ke qadmoñ meñ hī rahte haiñ

hamāre haath meñ kyuuñ ek taara bhī nahīñ hotā

Dubo detīñ hameñ dariyā-e-māh-o-sāl kī maujeñ

is ik lamhe kā jo hāsil sahārā bhī nahīñ hotā

ta'ajjub hai ki ham aksar vahīñ par Duub jaate haiñ

jahāñ se duur āñkhoñ meñ kināra bhī nahīñ hotā

sabhī ko shahr apnā dilkash-o-dilchasp lagtā hai

agarche vo samarqand-o-buḳhārā bhī nahīñ hotā

ye kin nā-āshnā logoñ kī bastī meñ chale aa.e

suḳhan kaisā kahīñ se ik ishāra bhī nahīñ hotā

muḳhālif mausam-e-dil hī nahīñ hotā masāfat meñ

muāfiq kuchh 'salīm' apnā sitāra bhī nahīñ hotā

use KHud ko badal lena gawara bhi nahin hota

hamara aisi duniya mein guzara bhi nahin hota

hamein is moD par le aate hain ye KHun ke rishte

ki jine ke 'alawa aur chaara bhi nahin hota

ye sare chand suraj un ke qadmon mein hi rahte hain

hamare hath mein kyun ek tara bhi nahin hota

Dubo detin hamein dariya-e-mah-o-sal ki maujen

is ek lamhe ka jo hasil sahaara bhi nahin hota

ta'ajjub hai ki hum aksar wahin par Dub jate hain

jahan se dur aankhon mein kinara bhi nahin hota

sabhi ko shahr apna dilkash-o-dilchasp lagta hai

agarche wo samarqand-o-buKHara bhi nahin hota

ye kin na-ashna logon ki basti mein chale aae

suKHan kaisa kahin se ek ishaara bhi nahin hota

muKHalif mausam-e-dil hi nahin hota masafat mein

muafiq kuchh 'salim' apna sitara bhi nahin hota