use pata nahin kya lutf inkisar mein hai

use pata nahīñ kyā lutf inkisār meñ hai

jo shaḳhs aaj bhī masrūf kār-zār meñ hai

ye sochte hue sūraj ne aañkh jhapkā.ī

fasīl-e-shab se pare koī intizār meñ hai

jab uḌtī ret ne putlī pe aa ke dastak dī

to jaan paayā ki sahrā bhī rahguzār meñ hai

jahān chhoḌ jahānoñ ke mohtasib se pūchh

hamārī girya-o-zārī kisī shumār meñ hai

baḌe makān ke saare makīn bhuul ga.e

havā kā zor parindoñ ke iḳhtiyār meñ hai

mire vajūd ke malbe ko sarsarī na sameT

ga.e dinoñ kī chamak bhī tah-e-ġhubār meñ hai

shab-e-firāq tirā saath kis tarah dūñgā

tamām din kī thakan jism ke madār meñ hai

taḌap rahā huuñ maiñ jis fard ke liye 'azvar'

yahāñ se duur kisī dūsre dayār meñ hai

use pata nahin kya lutf inkisar mein hai

jo shaKHs aaj bhi masruf kar-zar mein hai

ye sochte hue suraj ne aankh jhapkai

fasil-e-shab se pare koi intizar mein hai

jab uDti ret ne putli pe aa ke dastak di

to jaan paya ki sahra bhi rahguzar mein hai

jahan chhoD jahanon ke mohtasib se puchh

hamari girya-o-zari kisi shumar mein hai

baDe makan ke sare makin bhul gae

hawa ka zor parindon ke iKHtiyar mein hai

mere wajud ke malbe ko sarsari na sameT

gae dinon ki chamak bhi tah-e-ghubar mein hai

shab-e-firaq tera sath kis tarah dunga

tamam din ki thakan jism ke madar mein hai

taDap raha hun main jis fard ke liye 'azwar'

yahan se dur kisi dusre dayar mein hai