use rah-guzar koi kha gai ya bichhaD ke apne hi ghar gaya

use rah-guzar koī khā ga.ī yā bichhaḌ ke apne hī ghar gayā

vo jo 'umr-bhar kī rafāqatoñ kā thā mudda'ī vo kidhar gayā

vo jo ḳhvāb the vo bikhar ga.e vo jo aas thī vo simaT ga.ī

mujhe ḳhauf jis kā thā har ghaḌī mirā ham-navā vahī kar gayā

ye na.e zamāne kī riit hai tirī kyā ḳhatā tujhe kyā kahūñ

tujhe dil se jis ne lagāyā thā vahī tere dil se utar gayā

na.ī sohbatoñ kī suhānī rut tujhe raas aa.e mubāraka

vo jo jurm tark-e-vafā kā hai zarā soch kis ke vo sar gayā

nahīñ sahl 'ishq kī rah-guzar maiñ alam-nasīb-o-ḳhatā-sarisht

ai na.e na.e se musāfiro jo chalā to chal ke bikhar gayā

kabhī sehn-e-dil meñ udāsiyāñ jo baḌhīñ to saaz meñ Dhal ga.iiñ

kabhī ġham jo merī asaas hai mirī chashm-e-tar meñ Thahar gayā

ai sharīk-e-bazm na pūchh bas vo jo ham-safar the vo kyā hue

koī do qadam bhī na chal sakā koī darmiyāñ se hī ghar gayā

mirī zaat musht-e-ġhubār hai tirā aḳhtaroñ meñ shumār hai

zarā ye batā ki bichhaḌ ke tū kahāñ rif'atoñ pe Thahar gayā

maiñ phirūñ huuñ bār-e-jafā liye kabhī is Dagar kabhī us nagar

ki 'samar' yahāñ kā rivāj hai jo bhī chup rahā vahī mar gayā

use rah-guzar koi kha gai ya bichhaD ke apne hi ghar gaya

wo jo 'umr-bhar ki rafaqaton ka tha mudda'i wo kidhar gaya

wo jo KHwab the wo bikhar gae wo jo aas thi wo simaT gai

mujhe KHauf jis ka tha har ghaDi mera ham-nawa wahi kar gaya

ye nae zamane ki rit hai teri kya KHata tujhe kya kahun

tujhe dil se jis ne lagaya tha wahi tere dil se utar gaya

nai sohbaton ki suhani rut tujhe ras aae mubaraka

wo jo jurm tark-e-wafa ka hai zara soch kis ke wo sar gaya

nahin sahl 'ishq ki rah-guzar main alam-nasib-o-KHata-sarisht

ai nae nae se musafiro jo chala to chal ke bikhar gaya

kabhi sehn-e-dil mein udasiyan jo baDhin to saz mein Dhal gain

kabhi gham jo meri asas hai meri chashm-e-tar mein Thahar gaya

ai sharik-e-bazm na puchh bas wo jo ham-safar the wo kya hue

koi do qadam bhi na chal saka koi darmiyan se hi ghar gaya

meri zat musht-e-ghubar hai tera aKHtaron mein shumar hai

zara ye bata ki bichhaD ke tu kahan rif'aton pe Thahar gaya

main phirun hun bar-e-jafa liye kabhi is Dagar kabhi us nagar

ki 'samar' yahan ka riwaj hai jo bhi chup raha wahi mar gaya