use shikast na hone pe man kitna tha

use shikast na hone pe maan kitnā thā

jo reza reza huā saḳht-jān kitnā thā

hai ab diloñ meñ ye dahshat ki sar pe aa na gire

zamīñ se duur yahī āsmān kitnā thā

maiñ apnā zarf bhī dekhūñ ki us se ranjish par

bhulā diyā ki vahī mehrbān kitnā thā

bajā hai vus.at-e-duniyā magar chhuTā jab ghar

khulā ki tañg hamīñ par jahān kitnā thā

diye to bujh ga.e bijlī ke qumqume na bujhe

havā ko zor pe apne gumān kitnā thā

jo phuul god se us kī 'kamāl' chhīne ga.e

udaas un ke liye pūl-dān kitnā thā

use shikast na hone pe man kitna tha

jo reza reza hua saKHt-jaan kitna tha

hai ab dilon mein ye dahshat ki sar pe aa na gire

zamin se dur yahi aasman kitna tha

main apna zarf bhi dekhun ki us se ranjish par

bhula diya ki wahi mehrban kitna tha

baja hai wusat-e-duniya magar chhuTa jab ghar

khula ki tang hamin par jahan kitna tha

diye to bujh gae bijli ke qumqume na bujhe

hawa ko zor pe apne guman kitna tha

jo phul god se us ki 'kamal' chhine gae

udas un ke liye pul-dan kitna tha