ushshaq bahut hain tere bimar bahut hain

ushshāq bahut haiñ tire bīmār bahut haiñ

tujh husn-e-dil-ārām ke haqdār bahut haiñ

ai sañg-sifat aa ke sar-e-bām zarā dekh

ik ham hī nahīñ tere talabgār bahut haiñ

bechain kiye rakhtī hai har aan ye dil ko

kam-baḳht mohabbat ke bhī āzār bahut haiñ

miTTī ke khilaune haiñ tire haath meñ ham log

aur gir ke bikhar jaane ke āsār bahut haiñ

likkheñ to koī misra-e-tar likh nahīñ paate

aur 'ġhālib'-e-ḳhasta ke taraf-dār bahut haiñ

ai rabb-e-hunar chashm-e-ināyāt idhar bhī

har-chand ki ham tere gunahgār bahut haiñ

'ḳhāvar' use pā lene meñ kho dene kā Dar hai

andesha o hasrat ke miyāñ ḳhaar bahut haiñ

ushshaq bahut hain tere bimar bahut hain

tujh husn-e-dil-aram ke haqdar bahut hain

ai sang-sifat aa ke sar-e-baam zara dekh

ek hum hi nahin tere talabgar bahut hain

bechain kiye rakhti hai har aan ye dil ko

kam-baKHt mohabbat ke bhi aazar bahut hain

miTTi ke khilaune hain tere hath mein hum log

aur gir ke bikhar jaane ke aasar bahut hain

likkhen to koi misra-e-tar likh nahin pate

aur 'ghaalib'-e-KHasta ke taraf-dar bahut hain

ai rabb-e-hunar chashm-e-inayat idhar bhi

har-chand ki hum tere gunahgar bahut hain

'KHawar' use pa lene mein kho dene ka Dar hai

andesha o hasrat ke miyan KHar bahut hain