uslub yaqinan hai judagana KHuda ka

uslūb yaqīnan hai judāgāna ḳhudā kā

paḌhtā huuñ tujhe jaan ke afsāna ḳhudā kā

tālib kī talab vus.at-e-dāman se juḌī hai

ham rind samajh sakte haiñ paimāna ḳhudā kā

din raat Tapakte haiñ mirī aañkh se aañsū

ḳhālī nahīñ hotā kabhī mai-ḳhāna ḳhudā kā

aaya hai koī shaḳhs dil-e-zār meñ rahne

dekhā hai kisī ne kabhī vīrāna ḳhudā kā

kyā shaiḳh ko ādāb-e-fazīlat nahīñ aate

khīñche hai kabhī dast kabhī shāna ḳhudā kā

bosa bhī use dūñgā jo me.aar pe utre

har aag meñ jaltā nahīñ parvāna ḳhudā kā

jaate haiñ tabī.at kī ravānī jahāñ le jaa.e

maḳhsūs pata hai koī merā na ḳhudā kā

be-raunaqī ḳhāliq ko bhī achchhī nahīñ lagtī

rangoñ se bharā rahtā hai but-ḳhāna ḳhudā kā

uslub yaqinan hai judagana KHuda ka

paDhta hun tujhe jaan ke afsana KHuda ka

talib ki talab wusat-e-daman se juDi hai

hum rind samajh sakte hain paimana KHuda ka

din raat Tapakte hain meri aankh se aansu

KHali nahin hota kabhi mai-KHana KHuda ka

aaya hai koi shaKHs dil-e-zar mein rahne

dekha hai kisi ne kabhi virana KHuda ka

kya shaiKH ko aadab-e-fazilat nahin aate

khinche hai kabhi dast kabhi shana KHuda ka

bosa bhi use dunga jo mear pe utre

har aag mein jalta nahin parwana KHuda ka

jate hain tabiat ki rawani jahan le jae

maKHsus pata hai koi mera na KHuda ka

be-raunaqi KHaliq ko bhi achchhi nahin lagti

rangon se bhara rahta hai but-KHana KHuda ka