uTh jae darmiyan se jo parda hijab ka

uTh jaa.e darmiyāñ se jo parda hijāb kā

paḌh luuñ kitāb-e-husn se mazmūn ḳhvāb kā

apnī nazar bhī Daal de saaqī sharāb meñ

dekhe koī to us ko ho dhokā gulāb kā

zāhir pe kar naqāb to bātin pe kar nazar

matlūb hai nazārā jo us be-naqāb kā

us par tamām khul ga.e arz-o-samā ke raaz

hamrāz ho gayā jo tumhārī janāb kā

husn-o-jamāl-e-ishq se tharrā ga.ī fazā

jaise gayā ho chauñk vajūd āftāb kā

zau paa.e jis se ishq vo jalve bikher de

fitrat meñ rang bharnā hai maqsad shabāb kā

allah re tamtamāte se chehre kī āb-o-tāb

phīkā paḌe hai dekh ke rang āftāb kā

aariz ke zer-o-bam pe nazar jam ke rah ga.ī

merī nazar meñ ḳhaak thā sho.ala itaab kā

ḳhādim ke arz-e-hāl pe kartā hai sau savāl

laḌnā hai lā-javāb se ik lā-javāb kā

rindoñ meñ ek rind 'kañval' bhī hai dosto

āshiq hai aise daur meñ husn-e-sharāb kā

uTh jae darmiyan se jo parda hijab ka

paDh lun kitab-e-husn se mazmun KHwab ka

apni nazar bhi Dal de saqi sharab mein

dekhe koi to us ko ho dhoka gulab ka

zahir pe kar naqab to baatin pe kar nazar

matlub hai nazara jo us be-naqab ka

us par tamam khul gae arz-o-sama ke raaz

hamraaz ho gaya jo tumhaari janab ka

husn-o-jamal-e-ishq se tharra gai faza

jaise gaya ho chaunk wajud aaftab ka

zau pae jis se ishq wo jalwe bikher de

fitrat mein rang bharna hai maqsad shabab ka

allah re tamtamate se chehre ki aab-o-tab

phika paDe hai dekh ke rang aaftab ka

aariz ke zer-o-bam pe nazar jam ke rah gai

meri nazar mein KHak tha shoala itab ka

KHadim ke arz-e-haal pe karta hai sau sawal

laDna hai la-jawab se ek la-jawab ka

rindon mein ek rind 'kanwal' bhi hai dosto

aashiq hai aise daur mein husn-e-sharab ka