uTh kar chale hain aaj tere aastan se hum

uTh kar chale haiñ aaj tire āstāñ se ham

bezār ab haiñ bandagī-e-rā.egāñ se ham

ai dil har ek baat meñ be-rabtiyāñ haiñ kyoñ

kuchh mutma.in nahīñ haiñ tirī dāstāñ se ham

māyūs-kun hai manzil-e-ishq-e-butāñ kā shauq

aa pahuñche phir vahīñ ki chale the jahāñ se ham

dil ko to un ke lutf-o-karam ne miTā diyā

be-fā.eda ulajhte rahe āsmāñ se ham

apnī nigāh-e-shauq bhī ab tak hai be-ḳhabar

ai husn DhūñD kar tujhe laa.eñ kahāñ se ham

be-kaif thā fasāna-e-ulfat magar use

chamkā ga.e haiñ shoḳhī-e-tarz-e-bayāñ se ham

nākāmiyoñ ne gher liyā dam pe ban ga.ī

sab kuchh huā magar na dabe āsmāñ se ham

dushman bhī dekh kar hameñ hotā hai ashk-rez

ye faiz pā rahe haiñ kisī mehrbāñ se ham

'sāhir' qafas meñ ham ko ye azmat huī nasīb

baalā haiñ imtiyāz-e-bahār-o-ḳhizāñ se ham

uTh kar chale hain aaj tere aastan se hum

bezar ab hain bandagi-e-raegan se hum

ai dil har ek baat mein be-rabtiyan hain kyon

kuchh mutmain nahin hain teri dastan se hum

mayus-kun hai manzil-e-ishq-e-butan ka shauq

aa pahunche phir wahin ki chale the jahan se hum

dil ko to un ke lutf-o-karam ne miTa diya

be-faeda ulajhte rahe aasman se hum

apni nigah-e-shauq bhi ab tak hai be-KHabar

ai husn DhunD kar tujhe laen kahan se hum

be-kaif tha fasana-e-ulfat magar use

chamka gae hain shoKHi-e-tarz-e-bayan se hum

nakaamiyon ne gher liya dam pe ban gai

sab kuchh hua magar na dabe aasman se hum

dushman bhi dekh kar hamein hota hai ashk-rez

ye faiz pa rahe hain kisi mehrban se hum

'sahir' qafas mein hum ko ye azmat hui nasib

baala hain imtiyaz-e-bahaar-o-KHizan se hum