uTha le jaen gulshan se kidhar hum aashiyan apna

uThā le jaa.eñ gulshan se kidhar ham āshiyāñ apnā

huā hai ain fasl-e-gul meñ dushman bāġhbāñ apnā

koī shab aur vo rashk-e-qamar hai mehmāñ apnā

dikhā le chaar din kī chāñdnī ye bhī samāñ apnā

nahīñ haiñ kaun sī jā maut kī hasrat meñ sargardāñ

falak kartā hai va.ada dekhiye puurā kahāñ apnā

bure din meñ zamīñ kab paañv ke nīche Thahartī hai

kiyā karte haiñ shikva ham nahīñ hai āsmāñ apnā

chaman nāzāñ hai kyā apnī bahār-e-chand-roza par

liye jaatā hai dil shauq-e-bahār-e-jāvedāñ apnā

palak ko de ke jumbish phir ga.ī ham se jo aañkh un kī

havā par uḌ ga.ī kashtī uThā kar bādbāñ apnā

nahīñ hosh-o-ḳhirad kī barhamī saudā-e-gesū meñ

añdherī raat meñ ye luT rahā hai kārvāñ apnā

banāyā donoñ aalam se judā ik aur hī aalam

jo pūchhā be-ḳhudī se ek din nām-o-nishāñ apnā

samajh rakkho vahīñ vo ḳhud-numā bhī jalva-gar hogā

safā-e-dil dikhātī hogī ā.īna jahāñ apnā

halāvat se maze se lutf-o-shīrīnī se mamlū hai

zabāñ apnī suḳhan apnā kalām apnā bayāñ apnā

uTha le jaen gulshan se kidhar hum aashiyan apna

hua hai ain fasl-e-gul mein dushman baghban apna

koi shab aur wo rashk-e-qamar hai mehman apna

dikha le chaar din ki chandni ye bhi saman apna

nahin hain kaun si ja maut ki hasrat mein sargardan

falak karta hai wada dekhiye pura kahan apna

bure din mein zamin kab panw ke niche Thaharti hai

kiya karte hain shikwa hum nahin hai aasman apna

chaman nazan hai kya apni bahaar-e-chand-roza par

liye jata hai dil shauq-e-bahaar-e-jawedan apna

palak ko de ke jumbish phir gai hum se jo aankh un ki

hawa par uD gai kashti uTha kar baadban apna

nahin hosh-o-KHirad ki barhami sauda-e-gesu mein

andheri raat mein ye luT raha hai karwan apna

banaya donon aalam se juda ek aur hi aalam

jo puchha be-KHudi se ek din nam-o-nishan apna

samajh rakkho wahin wo KHud-numa bhi jalwa-gar hoga

safa-e-dil dikhati hogi aaina jahan apna

halawat se maze se lutf-o-shirini se mamlu hai

zaban apni suKHan apna kalam apna bayan apna