uTha leta hai apni eDiyan jab sath chalta hai

uThā letā hai apnī eḌiyāñ jab saath chaltā hai

vo baunā kis qadar mere qad-o-qāmat se jaltā hai

kabhī apne vasā.el se na baḌh kar ḳhvāhisheñ pā luuñ

vo paudā TuuT jaatā hai jo lā-mahdūd phaltā hai

masāfat meñ nahīñ hājat use chhitnār peḌoñ kī

bayābāñ kī dahaktī god meñ jo shaḳhs paltā hai

maiñ apne bachpane meñ chhū na paayā jin khilaunoñ ko

unhī ke vāste ab merā beTā bhī machaltā hai

mirī majbūriyāñ dekho use bhī mo'tabar samjhūñ

jo har taqrīr meñ apnā lab-o-lahja badaltā hai

badan ke saath merī ruuh bhī 'siprā' khathak nāche

ġhazal sāñche meñ jab koī nayā mazmūn Dhaltā hai

uTha leta hai apni eDiyan jab sath chalta hai

wo bauna kis qadar mere qad-o-qamat se jalta hai

kabhi apne wasael se na baDh kar KHwahishen pa lun

wo pauda TuT jata hai jo la-mahdud phalta hai

masafat mein nahin hajat use chhitnar peDon ki

bayaban ki dahakti god mein jo shaKHs palta hai

main apne bachpane mein chhu na paya jin khilaunon ko

unhi ke waste ab mera beTa bhi machalta hai

meri majburiyan dekho use bhi mo'tabar samjhun

jo har taqrir mein apna lab-o-lahja badalta hai

badan ke sath meri ruh bhi 'sipra' khathak nache

ghazal sanche mein jab koi naya mazmun Dhalta hai