uTha na parda-e-hairat ruKH-e-nihan se abhi

uThā na parda-e-hairat ruḳh-e-nihāñ se abhī

mire yaqīn ko fursat nahīñ gumāñ se abhī

na khol mujh pe pur-asrār zulmatoñ ke tilism

bahal rahī hai nazar māh-o-kahkashāñ se abhī

sunā na zamzama-e-rūh-e-kā.enāt mujhe

ki aa rahī hai sadā mere sāz-e-jāñ se abhī

abhī se de na mujhe manzil-e-adam kā surāġh

guzar rahā huuñ maiñ hastī ke imtihāñ se abhī

dikhā na ḳhvāb kisī ālam-e-digar ke mujhe

ki merā dil nahīñ fāriġh isī jahāñ se abhī

na kar haqīqat-e-hastī se āshnā mujh ko

ki rabt hai mujhe is vahm-e-rā.egāñ se abhī

banā rahā huuñ zamīñ par sanam-kade apne

sadā.eñ de na mujhe bām-e-āsmāñ se abhī

maqām-e-hosh bhī merī nazar meñ hai lekin

subū hai pur mirā sahbā-e-arġhavāñ se abhī

bhaḌak rahā hai abhī sho.ala-e-nafas merā

lapak rahe haiñ sharāre mirī zabāñ se abhī

hai zarra zarra tapāñ dasht-e-ārzū kā mire

uTheñge aur bagūle bahut yahāñ se abhī

fanā qubūl ho kyūñkar mujhe ki rishta-e-dil

bañdhā huā hai tamannā-e-jāvidāñ se abhī

uTha na parda-e-hairat ruKH-e-nihan se abhi

mere yaqin ko fursat nahin guman se abhi

na khol mujh pe pur-asrar zulmaton ke tilism

bahal rahi hai nazar mah-o-kahkashan se abhi

suna na zamzama-e-ruh-e-kaenat mujhe

ki aa rahi hai sada mere saz-e-jaan se abhi

abhi se de na mujhe manzil-e-adam ka suragh

guzar raha hun main hasti ke imtihan se abhi

dikha na KHwab kisi aalam-e-digar ke mujhe

ki mera dil nahin farigh isi jahan se abhi

na kar haqiqat-e-hasti se aashna mujh ko

ki rabt hai mujhe is wahm-e-raegan se abhi

bana raha hun zamin par sanam-kade apne

sadaen de na mujhe baam-e-asman se abhi

maqam-e-hosh bhi meri nazar mein hai lekin

subu hai pur mera sahba-e-arghawan se abhi

bhaDak raha hai abhi shoala-e-nafas mera

lapak rahe hain sharare meri zaban se abhi

hai zarra zarra tapan dasht-e-arzu ka mere

uThenge aur bagule bahut yahan se abhi

fana qubul ho kyunkar mujhe ki rishta-e-dil

bandha hua hai tamanna-e-jawidan se abhi