uThao jam uThao ki raat baqi hai

uThāo jaam uThāo ki raat baaqī hai

uḌaao kaag uḌaao kī raat baaqī hai

mileñ mileñ na mileñ phir ye fursateñ saaqī

pilāo aur pilāo ki raat baaqī hai

abhī to aa.ī hai baazī junūñ ke hāthoñ meñ

abhī na hosh meñ aao ki raat baaqī hai

abhī nasīb ne āñkheñ zarā sī kholī haiñ

nasīb aur jagāo ki raat baaqī hai

abhī to kahne do afsāna uljhī sāñsoñ ko

abhī zabāñ na hilāo ki raat baaqī hai

abhī kalī hī khilī hai kalī kalī na rahe

kalī ko phuul banāo ki raat baaqī hai

sahar to duur hai 'tālib' abhī se kyoñ chup ho

ġhazal ik aur sunāo ki raat baaqī hai

uThao jam uThao ki raat baqi hai

uDao kag uDao ki raat baqi hai

milen milen na milen phir ye fursaten saqi

pilao aur pilao ki raat baqi hai

abhi to aai hai bazi junun ke hathon mein

abhi na hosh mein aao ki raat baqi hai

abhi nasib ne aankhen zara si kholi hain

nasib aur jagao ki raat baqi hai

abhi to kahne do afsana uljhi sanson ko

abhi zaban na hilao ki raat baqi hai

abhi kali hi khili hai kali kali na rahe

kali ko phul banao ki raat baqi hai

sahar to dur hai 'talib' abhi se kyon chup ho

ghazal ek aur sunao ki raat baqi hai