uThao lauh-o-qalam hadse tamam likhun

uThāo lauh-o-qalam hādse tamām likhūñ

ravāñ sadī meñ huā hai jo qatl-e-ām likhūñ

nasīm-e-sub.h ibārat hai terī ḳhushbū se

sabā kī narm-ravī ko tirā ḳhirām likhūñ

ulajhtī sāñsoñ kī tafsīr ḳhūñ-chakāñ naġhma

sukūt TuuT bhī jaa.e to kis ke naam likhūñ

harīm-e-zāt farozāñ hai jis ke partav se

usī jhalak ko ufuq par mah-e-tamām likhūñ

koī to sub.h-e-rifāqat se kar sakūñ ta.abīr

koī to shaam tire saath apne naam likhūñ

chhalak rahī hai subūhī qadam kī laġhzish se

siyāh chashm kī gardish ko daur-e-jām likhūñ

ajab ishāre haiñ nīchī nigāh ke 'ishrat'

vo jitne rañj bhī de ḳhud ko shād-kām likhūñ

uThao lauh-o-qalam hadse tamam likhun

rawan sadi mein hua hai jo qatl-e-am likhun

nasim-e-subh ibarat hai teri KHushbu se

saba ki narm-rawi ko tera KHiram likhun

ulajhti sanson ki tafsir KHun-chakan naghma

sukut TuT bhi jae to kis ke nam likhun

harim-e-zat farozan hai jis ke partaw se

usi jhalak ko ufuq par mah-e-tamam likhun

koi to subh-e-rifaqat se kar sakun tabir

koi to sham tere sath apne nam likhun

chhalak rahi hai subuhi qadam ki laghzish se

siyah chashm ki gardish ko daur-e-jam likhun

ajab ishaare hain nichi nigah ke 'ishrat'

wo jitne ranj bhi de KHud ko shad-kaam likhun