uThaya hi nahin jata jo bar-e-zindagi humse

uThāyā hī nahīñ jaatā jo bār-e-zindagī ham se

kināra kar chukī shāyad kisī kī yaad bhī ham se

kabhī mānūs thī kitnī bahār-e-zindagī ham se

magar dāman-kashāñ hai āj-kal har ik ḳhushī ham se

shab-e-ġham is tarah bhī kaT ga.ī hai bārhā apnī

kisī kī yaad pahroñ guftugū kartī rahī ham se

kisī ke vāste tark-e-ta.alluq mashġhala Thahrā

hamāre dil pe jo guzrī hai vo pūchhe koī ham se

kisī ko shād-kāmī hai kisī ko nā-murādī hai

mileñge rāh-e-ulfat meñ koī tum se koī ham se

tirī chashm-e-karam kī vo tavajjoh hī nahīñ varna

kahāñ thī is qadar barham hamārī zindagī ham se

basā-auqāt ham ne mai-kade ke dar pe dastak dī

tabī.at jab kisī sūrat na bahlā.ī ga.ī ham se

kahāñ tak ḳhud-farebī meñ raheñ ham mubtalā 'āsī'

laboñ pe laa.ī jā saktī nahīñ jhūTī hañsī ham se

uThaya hi nahin jata jo bar-e-zindagi hum se

kinara kar chuki shayad kisi ki yaad bhi hum se

kabhi manus thi kitni bahaar-e-zindagi hum se

magar daman-kashan hai aaj-kal har ek KHushi hum se

shab-e-gham is tarah bhi kaT gai hai barha apni

kisi ki yaad pahron guftugu karti rahi hum se

kisi ke waste tark-e-talluq mashghala Thahra

hamare dil pe jo guzri hai wo puchhe koi hum se

kisi ko shad-kaami hai kisi ko na-muradi hai

milenge rah-e-ulfat mein koi tum se koi hum se

teri chashm-e-karam ki wo tawajjoh hi nahin warna

kahan thi is qadar barham hamari zindagi hum se

basa-auqat hum ne mai-kade ke dar pe dastak di

tabiat jab kisi surat na bahlai gai hum se

kahan tak KHud-farebi mein rahen hum mubtala 'asi'

labon pe lai ja sakti nahin jhuTi hansi hum se