uThe hain hath dua ke us aadmi ke liye

uThe haiñ haath duā ke us aadmī ke liye

jo kaam kartā hai duniyā kī behtarī ke liye

ilaaj kyā agar is par bhī Thokareñ khā.eñ

milā zamīr hai insāñ ko raushnī ke liye

khilā.e phuul ka.ī phal kiye kahīñ paidā

hazār ne.amateñ paidā kiiñ aadmī ke liye

na.ī hayāt kā paiġhām detī hai jab maut

to jaan kis liye de koī zindagī ke liye

ḳhushī ke maare na bachte agar na hotā ġham

sahārā ġham kā zarūrī hai zindagī ke liye

jahāñ meñ koī nahīñ ġham se jo nahīñ vāqif

kisī ko ġham hai koī ġham koī kisī ke liye

qadam qadam pe yahāñ ehtiyāt lāzim hai

maqām-e-aish jahāñ kab hai aadmī ke liye

rah-e-adam hai yahāñ sar jhukā ke chal 'sūfī'

ye rahguzar hai ḳhatarnāk ḳhud-sarī ke liye

uThe hain hath dua ke us aadmi ke liye

jo kaam karta hai duniya ki behtari ke liye

ilaj kya agar is par bhi Thokaren khaen

mila zamir hai insan ko raushni ke liye

khilae phul kai phal kiye kahin paida

hazar neamaten paida kin aadmi ke liye

nai hayat ka paigham deti hai jab maut

to jaan kis liye de koi zindagi ke liye

KHushi ke mare na bachte agar na hota gham

sahaara gham ka zaruri hai zindagi ke liye

jahan mein koi nahin gham se jo nahin waqif

kisi ko gham hai koi gham koi kisi ke liye

qadam qadam pe yahan ehtiyat lazim hai

maqam-e-aish jahan kab hai aadmi ke liye

rah-e-adam hai yahan sar jhuka ke chal 'sufi'

ye rahguzar hai KHatarnak KHud-sari ke liye