utri hain dar-o-baam se aksar teri yaaden

utrī haiñ dar-o-bām se aksar tirī yādeñ

aatī haiñ darīchoñ se bhī chhan kar tirī yādeñ

karne nahīñ detī haiñ koī kaam kisī taur

maflūj mujhe rakhtī haiñ din bhar tirī yādeñ

shādāb hī rahtā hai sadā zaḳhmoñ se tere

hone na deñ dil ko kabhī banjar tirī yādeñ

mujh ko to kabhī chhoḌ ke jaatī hī nahīñ haiñ

tujh se to ka.ī darja haiñ behtar tirī yādeñ

āvāz chhanāke kī maiñ suntī huuñ hamesha

ā.īna hai dil merā to patthar tirī yādeñ

āñkhoñ se ubal paḌtī haiñ maiñ rokūñ to kaise

kuuza mirā dil hai to samundar tirī yādeñ

'farzāna' bhalā ḳhud ko bachā.e bhī to kaise

andar tirī yādeñ haiñ to bāhar tirī yādeñ

utri hain dar-o-baam se aksar teri yaaden

aati hain darichon se bhi chhan kar teri yaaden

karne nahin deti hain koi kaam kisi taur

mafluj mujhe rakhti hain din bhar teri yaaden

shadab hi rahta hai sada zaKHmon se tere

hone na den dil ko kabhi banjar teri yaaden

mujh ko to kabhi chhoD ke jati hi nahin hain

tujh se to kai darja hain behtar teri yaaden

aawaz chhanake ki main sunti hun hamesha

aaina hai dil mera to patthar teri yaaden

aankhon se ubal paDti hain main rokun to kaise

kuza mera dil hai to samundar teri yaaden

'farzana' bhala KHud ko bachae bhi to kaise

andar teri yaaden hain to bahar teri yaaden