uTTha hun ek hujum-e-tamanna liye hue

uTThā huuñ ik hujūm-e-tamannā liye hue

duniyā se jā rahā huuñ maiñ duniyā liye hue

muddat se garche jalva-gah-e-tūr se ḳhamosh

āñkheñ haiñ ab bhī zauq-e-tamāshā liye hue

duniyā-e-ārzū se kināra to kar ke dekh

duniyā khaḌī hai daulat-e-duniyā liye hue

roz-e-azal se ishq hai nākām-e-ārzū

dil hai magar hujūm-e-tamannā liye hue

ai kam-nigāh dīda-e-dil se nigāh kar

har zarra hai haqīqat-e-sahrā liye hue

hastī kī sub.h kaun sī mahfil kā hai ma.aal

āñkheñ khulī haiñ hasrat-e-jalva liye hue

din-bhar mirī nazar meñ hai vo yūsuf-e-bahār

aatī hai raat ḳhvāb-e-zuleḳhā liye hue

dil phir chalā hai le ke tire āstāñ kī samt

apnī shikastagī kā sahārā liye hue

vo din kahāñ ki thī mujhe jiine kī aarzū

phirtā huuñ ab to dil kā janāzā liye hue

uTTha hun ek hujum-e-tamanna liye hue

duniya se ja raha hun main duniya liye hue

muddat se garche jalwa-gah-e-tur se KHamosh

aankhen hain ab bhi zauq-e-tamasha liye hue

duniya-e-arzu se kinara to kar ke dekh

duniya khaDi hai daulat-e-duniya liye hue

roz-e-azal se ishq hai nakaam-e-arzu

dil hai magar hujum-e-tamanna liye hue

ai kam-nigah dida-e-dil se nigah kar

har zarra hai haqiqat-e-sahra liye hue

hasti ki subh kaun si mahfil ka hai maal

aankhen khuli hain hasrat-e-jalwa liye hue

din-bhar meri nazar mein hai wo yusuf-e-bahaar

aati hai raat KHwab-e-zuleKHa liye hue

dil phir chala hai le ke tere aastan ki samt

apni shikastagi ka sahaara liye hue

wo din kahan ki thi mujhe jine ki aarzu

phirta hun ab to dil ka janaza liye hue