uTThe jis bazm se tum gham ka saman chhoD aae

uTThe jis bazm se tum ġham kā samāñ chhoḌ aa.e

diye mahfil se uThā laa.e dhuāñ chhoḌ aa.e

ek TuuTā huā be-kār safīna ham haiñ

hameñ ab sail-e-balā chāhe jahāñ chhoḌ aa.e

aaj sar phūTegā ro.egī na dīvār terī

shahr se duur hameñ ahl-e-jahāñ chhoḌ aa.e

hañs ke jī-bhar ke zamāne ki junūñ haar gayā

nāsehā ḳhush ho ki ham kū-e-butāñ chhoḌ aa.e

mere hāthoñ kī lakīreñ thiiñ vo rāheñ ai dost

mere hāthoñ ko tire haath jahāñ chhoḌ aa.e

na chalā ba.ad hamāre koī rāh-e-ġham meñ

jise har-gām pe ik sañg-e-girāñ chhoḌ aa.e

din bahāroñ ke palaT aa.e 'musavvir' lekin

jaane us jān-e-bahārāñ ko kahāñ chhoḌ aa.e

uTThe jis bazm se tum gham ka saman chhoD aae

diye mahfil se uTha lae dhuan chhoD aae

ek TuTa hua be-kar safina hum hain

hamein ab sail-e-bala chahe jahan chhoD aae

aaj sar phuTega roegi na diwar teri

shahr se dur hamein ahl-e-jahan chhoD aae

hans ke ji-bhar ke zamane ki junun haar gaya

naseha KHush ho ki hum ku-e-butan chhoD aae

mere hathon ki lakiren thin wo rahen ai dost

mere hathon ko tere hath jahan chhoD aae

na chala baad hamare koi rah-e-gham mein

jise har-gam pe ek sang-e-giran chhoD aae

din bahaaron ke palaT aae 'musawwir' lekin

jaane us jaan-e-bahaaran ko kahan chhoD aae