uTThe kahin se dard-e-jigar tumko is se kya

uTThe kahīñ se dard-e-jigar tum ko is se kyā

lete nahīñ ho merī ḳhabar tum ko is se kyā

do hī qadam chalī thī paḌe chhāle paañv meñ

ġham se hai chuur zauq-e-safar tum ko is se kyā

hālāt ne hañsī mire hoñToñ se chhīn lī

rotī huuñ ab maiñ shām-o-sahar tum ko is se kyā

kāġhaz kā phuul chhū luuñ to vo bhī mahak uThe

dekho na tum jo dast-e-hunar tum ko is se kyā

dekho na mujh ko hañs ke zamāna ḳharāb hai

rusvā.ī kā hai mujh ko bhī Dar tum ko is se kyā

manzil pukārtī hai chale aao jald tum

hai ūñchī nīchī tirchhī Dagar tum ko is se kyā

'zaryāb' se ye tum ne kahā chāhtā huuñ maiñ

patthar sī ho ga.ī hai nazar tum ko is se kyā

uTThe kahin se dard-e-jigar tum ko is se kya

lete nahin ho meri KHabar tum ko is se kya

do hi qadam chali thi paDe chhaale panw mein

gham se hai chur zauq-e-safar tum ko is se kya

haalat ne hansi mere honTon se chhin li

roti hun ab main sham-o-sahar tum ko is se kya

kaghaz ka phul chhu lun to wo bhi mahak uThe

dekho na tum jo dast-e-hunar tum ko is se kya

dekho na mujh ko hans ke zamana KHarab hai

ruswai ka hai mujh ko bhi Dar tum ko is se kya

manzil pukarti hai chale aao jald tum

hai unchi nichi tirchhi Dagar tum ko is se kya

'zaryab' se ye tum ne kaha chahta hun main

patthar si ho gai hai nazar tum ko is se kya