unche peDon ke niche hansi rah gai

ūñche peḌoñ ke nīche hañsī rah ga.ī

kaalī parchhā.īñ meñ chāñdnī rah ga.ī

surḳh gāloñ pe aañsū ke qatre gire

phuul se hoñT par tishnagī rah ga.ī

ai ḳhudā terī duniyā meñ sab kuchh to hai

dil dhaḌaktā hai kyoñ kyā kamī rah ga.ī

kis ne tasvīr khīñchī hai āvāz kī

duur se boltī zindagī rah ga.ī

sar-e-shām tezī se ruḳhsat huī

raat ke haath meñ raushnī rah ga.ī

gahrī ḳhāmoshiyoñ meñ shikan thī bahut

niiñd āñkhoñ tale jāgtī rah ga.ī

sard rātoñ kī peshāniyāñ chuum kar

barf sī sub.hoñ meñ kapkapī rah ga.ī

saare aurāq dīmak-zada the magar

vaqt ke saaz par shā.irī rah ga.ī

harf aayā nahīñ merī 'ulfat' pe kyoñ

jāñ-ba-haq ho ga.e jāñ-kanī rah ga.ī

unche peDon ke niche hansi rah gai

kali parchhain mein chandni rah gai

surKH galon pe aansu ke qatre gire

phul se honT par tishnagi rah gai

ai KHuda teri duniya mein sab kuchh to hai

dil dhaDakta hai kyon kya kami rah gai

kis ne taswir khinchi hai aawaz ki

dur se bolti zindagi rah gai

sar-e-sham tezi se ruKHsat hui

raat ke hath mein raushni rah gai

gahri KHamoshiyon mein shikan thi bahut

nind aankhon tale jagti rah gai

sard raaton ki peshaniyan chum kar

barf si subhon mein kapkapi rah gai

sare auraq dimak-zada the magar

waqt ke saz par shairi rah gai

harf aaya nahin meri 'ulfat' pe kyon

jaan-ba-haq ho gae jaan-kani rah gai