unT sab wapas phire aage koi sahra na tha

uuñT sab vāpas phire aage koī sahrā na thā

naqsh-e-pā hī naqsh-e-pā the duur tak rasta na thā

apne andar kitne mausam aur bāhar zardiyāñ

maiñ fasīl-e-jism meñ jab thā to yuuñ phīkā na thā

phir khajūroñ ke daraḳhtoñ meñ dhuāñ sā kis liye

aag jab taapī na thī aur qāfila Thahrā na thā

kāġhzī poshāk meñ vo ghar se jab bāhar gayā

āsmāñ par abr ban kar maiñ abhī barsā na thā

har taraf bikhrī huī reg-e-nadāmat thī 'nazar'

jism kā chaḌhtā huā dariyā magar utrā na thā

unT sab wapas phire aage koi sahra na tha

naqsh-e-pa hi naqsh-e-pa the dur tak rasta na tha

apne andar kitne mausam aur bahar zardiyan

main fasil-e-jism mein jab tha to yun phika na tha

phir khajuron ke daraKHton mein dhuan sa kis liye

aag jab tapi na thi aur qafila Thahra na tha

kaghzi poshak mein wo ghar se jab bahar gaya

aasman par abr ban kar main abhi barsa na tha

har taraf bikhri hui reg-e-nadamat thi 'nazar'

jism ka chaDhta hua dariya magar utra na tha