wade se mukar jaana dagha hai ki nahin hai

vā'de se mukar jaanā daġhā hai ki nahīñ hai

tum hī kaho kuchh is kī sazā hai ki nahīñ hai

kyā baat hai aa dhamke achānak sar-e-mahfil

andāz tumhārā ye bajā hai ki nahīñ hai

dekhā hai tumheñ chūmte ā.īne meñ ḳhud ko

duniyā meñ koī chiiz hayā hai ki nahīñ hai

kuchh sar-phire tūfān uThāte haiñ to is meñ

hākim kī bhī ḳhāmosh razā hai ki nahīñ hai

ġhairoñ ke gile-shikve na apnoñ ke masā.il

tanhā.ī meñ jiine kā mazā hai ki nahīñ hai

saa.il ne sadā dene meñ hī der lagā dī

ab dekhiye kuchh ghar meñ bachā hai ki nahīñ hai

suntā huuñ ki gardish meñ hai dīvānoñ kī fehrist

dekhūñ to mirā naam likhā hai ki nahīñ hai

phir 'nazr' parakh ġhaur se yūnus kā vaqū’a

machhlī ke shikam meñ bhī ḳhudā hai ki nahīñ hai

wa'de se mukar jaana dagha hai ki nahin hai

tum hi kaho kuchh is ki saza hai ki nahin hai

kya baat hai aa dhamke achanak sar-e-mahfil

andaz tumhaara ye baja hai ki nahin hai

dekha hai tumhein chumte aaine mein KHud ko

duniya mein koi chiz haya hai ki nahin hai

kuchh sar-phire tufan uThate hain to is mein

hakim ki bhi KHamosh raza hai ki nahin hai

ghairon ke gile-shikwe na apnon ke masail

tanhai mein jine ka maza hai ki nahin hai

sail ne sada dene mein hi der laga di

ab dekhiye kuchh ghar mein bacha hai ki nahin hai

sunta hun ki gardish mein hai diwanon ki fehrist

dekhun to mera nam likha hai ki nahin hai

phir 'nazr' parakh ghaur se yunus ka waqu’a

machhli ke shikam mein bhi KHuda hai ki nahin hai