waiz tu chhoD ab to adawat ka rasta

vā'iz tū chhoḌ ab to 'adāvat kā rāsta

maz.hab kī aaḌ meñ ye siyāsat kā rāsta

mā'būd hai mirā bhī jo masjūd hai tirā

maanā judā-judā hai 'ibādat kā rāsta

dil meñ jo hai makīñ use kā'be meñ DhūñDh mat

zāhid zarā badal tū ziyārat kā rāsta

ham ko visāl-e-haq meñ gavāra nahīñ hai der

lambā bahut hai shaiḳh sharī’at kā rāsta

ḳhāliq se hai visāl kī vā'iz talab agar

kar iḳhtiyār ḳhidmat-e-ḳhalqat kā rāsta

tum ko ye rāh-e-zuhd mubārak ho zāhido

raas aa gayā hai ham ko mohabbat kā rāsta

har samt se sugandh kī aamad chaman meñ ho

roke na koī dosto nik.hat kā rāsta

masjid ko chhoḌ kar jo na aaya gayā kahīñ

dekho dikhā rahā hai vo jannat kā rāsta

kitnī jamī hai dhuul tirī ruuh par 'sadā'

tai karte karte kokh se turbat kā rāsta

wa'iz tu chhoD ab to 'adawat ka rasta

mazhab ki aaD mein ye siyasat ka rasta

ma'bud hai mera bhi jo masjud hai tera

mana juda-juda hai 'ibaadat ka rasta

dil mein jo hai makin use ka'be mein DhunDh mat

zahid zara badal tu ziyarat ka rasta

hum ko visal-e-haq mein gawara nahin hai der

lamba bahut hai shaiKH shari’at ka rasta

KHaliq se hai visal ki wa'iz talab agar

kar iKHtiyar KHidmat-e-KHalqat ka rasta

tum ko ye rah-e-zuhd mubarak ho zahido

ras aa gaya hai hum ko mohabbat ka rasta

har samt se sugandh ki aamad chaman mein ho

roke na koi dosto nikhat ka rasta

masjid ko chhoD kar jo na aaya gaya kahin

dekho dikha raha hai wo jannat ka rasta

kitni jami hai dhul teri ruh par 'sada'

tai karte karte kokh se turbat ka rasta