wada-e-ulfat-o-paiman-e-wafa se tauba

va.ada-e-ulfat-o-paimān-e-vafā se tauba

tajraba kahtā hai us husn-e-adā se tauba

raat tārīk hai bechainī baḌhī jaatī hai

jis kā ulTā ho asar aisī duā se tauba

apnā ghar ban gayā maqtal magar ham ahl-e-yaqīñ

nahīñ karte haiñ ġham-e-hosh-rubā se tauba

un kī fasta.ī tabī.at meñ hai qatl-o-ġhārat

kyuuñ kareñge vo bhalā zulm-o-jafā se tauba

bijlī chamke to bahāne se lipaT jaate haiñ

phir vo kahte haiñ baḌī sharm-o-hayā se tauba

chashm-e-sāqī kī qasam thā ye bahāna varna

kahīñ karte haiñ mai-o-jām ke pyāse tauba

us ne to chiir diyā ahl-e-chaman ke dil ko

ab ke bal khaa.ī huī bād-e-sabā se tauba

wada-e-ulfat-o-paiman-e-wafa se tauba

tajraba kahta hai us husn-e-ada se tauba

raat tarik hai bechaini baDhi jati hai

jis ka ulTa ho asar aisi dua se tauba

apna ghar ban gaya maqtal magar hum ahl-e-yaqin

nahin karte hain gham-e-hosh-ruba se tauba

un ki fastai tabiat mein hai qatl-o-ghaarat

kyun karenge wo bhala zulm-o-jafa se tauba

bijli chamke to bahane se lipaT jate hain

phir wo kahte hain baDi sharm-o-haya se tauba

chashm-e-saqi ki qasam tha ye bahana warna

kahin karte hain mai-o-jam ke pyase tauba

us ne to chir diya ahl-e-chaman ke dil ko

ab ke bal khai hui baad-e-saba se tauba