wada kabhi sachcha koi karta hi nahin hai

va.ada kabhī sachchā koī kartā hī nahīñ hai

andesha-e-fardā to guzartā hī nahīñ hai

dāman kī shikan duur se letī hai balā.eñ

bal yaar ke abrū kā utartā hī nahīñ hai

dil se to mire siine ke phir daaġh hī achchhe

kam-baḳht ubhāre se ubhartā hī nahīñ hai

sab bhuul ga.e us ko tire ahd-e-sitam meñ

ab shikva-e-gardūñ koī kartā hī nahīñ hai

jo jānte haiñ baḌh ke nasheman se qafas ko

par aisoñ ke sayyād katartā hī nahīñ hai

kyā chiiz hai ai bāda-kasho mausam-e-gul bhī

is daur meñ tauba koī kartā hī nahīñ hai

apne sitam-o-jaur use laakh sikhāo

darbāñ se tumhāre koī Dartā hī nahīñ hai

yuuñ pisne ko dil laakh piseñ barg-e-hinā par

vo haath kabhī ḳhuun meñ bhartā hī nahīñ hai

kyā aa ga.ī us meñ dil-e-betāb kī uljhan

gesū hai kisī kā ki sañvartā hī nahīñ hai

samjhā hai asar koī balā aah ko merī

Dartā hai vo gardūñ se utartā hī nahīñ hai

jab tak koī aa.e na lab-e-bām nikhar kar

rañg-e-shafaq-e-shām nikhartā hī nahīñ hai

dīvāna 'riyāz' auroñ se kyā baat karegā

māshūqoñ se to baat vo kartā hī nahīñ hai

wada kabhi sachcha koi karta hi nahin hai

andesha-e-farda to guzarta hi nahin hai

daman ki shikan dur se leti hai balaen

bal yar ke abru ka utarta hi nahin hai

dil se to mere sine ke phir dagh hi achchhe

kam-baKHt ubhaare se ubharta hi nahin hai

sab bhul gae us ko tere ahd-e-sitam mein

ab shikwa-e-gardun koi karta hi nahin hai

jo jaante hain baDh ke nasheman se qafas ko

par aison ke sayyaad katarta hi nahin hai

kya chiz hai ai baada-kasho mausam-e-gul bhi

is daur mein tauba koi karta hi nahin hai

apne sitam-o-jaur use lakh sikhao

darban se tumhaare koi Darta hi nahin hai

yun pisne ko dil lakh pisen barg-e-hina par

wo hath kabhi KHun mein bharta hi nahin hai

kya aa gai us mein dil-e-betab ki uljhan

gesu hai kisi ka ki sanwarta hi nahin hai

samjha hai asar koi bala aah ko meri

Darta hai wo gardun se utarta hi nahin hai

jab tak koi aae na lab-e-baam nikhar kar

rang-e-shafaq-e-sham nikharta hi nahin hai

diwana 'riyaz' auron se kya baat karega

mashuqon se to baat wo karta hi nahin hai