wah kya KHub asiri meri taqdir mein hai

vaah kyā ḳhuub asīrī mirī taqdīr meñ hai

paañv zanjīr meñ dil zulf-e-girah-gīr meñ hai

ho ga.ī pusht-ba-dīvār use dekh ke ḳhalq

ai parī-zād vo hairat tirī tasvīr meñ hai

koshisheñ saiñkaḌoñ kiiñ ham ne asar kuchh na huā

shudanī naam usī kā hai vo taqdīr meñ hai

mere ghar aap qadam-ranja kareñ yā shah deñ

aap kī ḳhāk-e-qadam kā asar iksīr meñ hai

hai ye be-chain ki dam bhar nahīñ lailā ko qarār

kaisī jhankār ye majnūñ tirī zanjīr meñ hai

o kamāñ-dār nahīñ jaañ bhī hameñ tujh se aziiz

hai ta.ajjub ki tujhe kashmakash ik tiir meñ hai

maiñ bhī huuñ fikr meñ terī ki barābar kī hai choT

tū jo ai charḳh-e-sitamgar mirī tadbīr meñ hai

hai ḳhudā se mujhe firdaus ke milne kī umiid

baap aadam the mere ye mirī jāgīr meñ hai

kyoñ na bhāge ye balā-e-shab-e-hijr ai 'akbar'

asar-e-āh-e-sahar nāla-e-shabgīr meñ hai

wah kya KHub asiri meri taqdir mein hai

panw zanjir mein dil zulf-e-girah-gir mein hai

ho gai pusht-ba-diwar use dekh ke KHalq

ai pari-zad wo hairat teri taswir mein hai

koshishen sainkaDon kin hum ne asar kuchh na hua

shudani nam usi ka hai wo taqdir mein hai

mere ghar aap qadam-ranja karen ya shah den

aap ki KHak-e-qadam ka asar iksir mein hai

hai ye be-chain ki dam bhar nahin laila ko qarar

kaisi jhankar ye majnun teri zanjir mein hai

o kaman-dar nahin jaan bhi hamein tujh se aziz

hai tajjub ki tujhe kashmakash ek tir mein hai

main bhi hun fikr mein teri ki barabar ki hai choT

tu jo ai charKH-e-sitamgar meri tadbir mein hai

hai KHuda se mujhe firdaus ke milne ki umid

bap aadam the mere ye meri jagir mein hai

kyon na bhage ye bala-e-shab-e-hijr ai 'akbar'

asar-e-ah-e-sahar nala-e-shabgir mein hai