waiz milegi KHuld mein kab is qadar sharab

vaa.iz milegī ḳhuld meñ kab is qadar sharāb

paanī ke badle piite haiñ ai be-ḳhabar sharāb

aamad meñ us kī mast hue kuchh ḳhabar nahīñ

saaqī hai kaun jaam kahāñ aur kidhar sharāb

us qulzum-e-gunāh meñ Duubā huā huuñ maiñ

jis meñ hai ek mauja-e-dāmān-e-tar sharāb

mastī meñ un ko lag ga.ī lau aur ġhair kī

denī shab-e-visāl na thī is qadar sharāb

iqrār-e-vasl aur vo mast-e-ġhurūr-e-nāz

aayā hai pī ke tū kahīñ ai nāma-bar sharāb

maiñ ek baar aañkh churā kar jo pī gayā

laayā na zaḳhm dhone ko phir chāragar sharāb

karnā thā mujh ko hiila shikast-e-ḳhumār kā

denī thī ḳhuub qabl-e-tulū-e-sahar sharāb

ruḳhsat kā hosh un ko na rahtā shab-e-visāl

kuchh bolte to ye ki dharī hai kidhar sharāb

'sālik' mile jo bazm meñ us kī to lutf hai

varna piyā hī karte haiñ ham apne ghar sharāb

waiz milegi KHuld mein kab is qadar sharab

pani ke badle pite hain ai be-KHabar sharab

aamad mein us ki mast hue kuchh KHabar nahin

saqi hai kaun jam kahan aur kidhar sharab

us qulzum-e-gunah mein Duba hua hun main

jis mein hai ek mauja-e-daman-e-tar sharab

masti mein un ko lag gai lau aur ghair ki

deni shab-e-visal na thi is qadar sharab

iqrar-e-wasl aur wo mast-e-ghurur-e-naz

aaya hai pi ke tu kahin ai nama-bar sharab

main ek bar aankh chura kar jo pi gaya

laya na zaKHm dhone ko phir chaaragar sharab

karna tha mujh ko hila shikast-e-KHumar ka

deni thi KHub qabl-e-tulu-e-sahar sharab

ruKHsat ka hosh un ko na rahta shab-e-visal

kuchh bolte to ye ki dhari hai kidhar sharab

'salik' mile jo bazm mein us ki to lutf hai

warna piya hi karte hain hum apne ghar sharab