waqif-e-raaz-e-bahr-e-gham dil hai

vāqif-e-rāz-e-bahr-e-ġham dil hai

mauj-e-tūfāñ kā naam sāhil hai

soz-e-paiham pe mutma.in dil hai

kaif-e-ġham zindagī kā hāsil hai

allah allah ye ishq kā in.aam

dard kī Tiis ishrat-e-dil hai

un ke jalve meñ kho gayā huuñ maiñ

mujh ko me.arāj-e-ishq hāsil hai

vo haiñ be-parda sāmne lekin

parda-e-shauq-e-dīd haa.il hai

bahr-e-nākāmī-e-mohabbat meñ

ubhre jo Duub kar vahī dil hai

tāb-e-nazzāra chāhiye 'māhir'

zarre zarre meñ husn-e-kāmil hai

waqif-e-raaz-e-bahr-e-gham dil hai

mauj-e-tufan ka nam sahil hai

soz-e-paiham pe mutmain dil hai

kaif-e-gham zindagi ka hasil hai

allah allah ye ishq ka inam

dard ki Tis ishrat-e-dil hai

un ke jalwe mein kho gaya hun main

mujh ko mearaj-e-ishq hasil hai

wo hain be-parda samne lekin

parda-e-shauq-e-did hail hai

bahr-e-nakaami-e-mohabbat mein

ubhre jo Dub kar wahi dil hai

tab-e-nazzara chahiye 'mahir'

zarre zarre mein husn-e-kaamil hai