waraftagi-e-ishq hai ya be-KHudi hai ye

vāraftagī-e-ishq hai yā be-ḳhudī hai ye

mujh se jo pūchhiye to mirī zindagī hai ye

dil un ke ġham se ḳhush hai ajab dil-lagī hai ye

ya.anī ki dukh kā dukh hai hañsī kī hañsī hai ye

dil bhī mirā sharīk nahīñ bekasī hai ye

hai maut kis kā naam agar zindagī hai ye

kab chāhtā huuñ maiñ ki ḳhushī ho mujhe nasīb

maiñ bhī usī meñ ḳhush huuñ jo un kī ḳhushī hai ye

barbād ho gayā huuñ jahāñ luT gayā huuñ maiñ

koī mujhe batāo ki kis kī galī hai ye

shāyad ki aap yūñhī mirī baat pūchh leñ

samjhe bhī aap kuchh sabab-e-ḳhāmushī hai ye

mujh se nazar milī hai to mujh ko sañbhāliye

banda-navāz pahle-pahal maiñ ne pī hai ye

kyā dekhte ho hashr meñ ik dād-ḳhvāh ko

jo be-gunāh qatl huā thā vahī hai ye

haañ haañ satāo tum kisī īzā-pasand ko

har chand dushmanī hai magar dostī hai ye

merī taraf hai ab na tavajjoh na iltifāt

zālim ne zabt-e-ġham kī mujhe daad dī hai ye

vo kah rahe haiñ bazm meñ 'nudrat' ko dekh kar

ham is ko jānte haiñ baḌā fitratī hai ye

waraftagi-e-ishq hai ya be-KHudi hai ye

mujh se jo puchhiye to meri zindagi hai ye

dil un ke gham se KHush hai ajab dil-lagi hai ye

yani ki dukh ka dukh hai hansi ki hansi hai ye

dil bhi mera sharik nahin bekasi hai ye

hai maut kis ka nam agar zindagi hai ye

kab chahta hun main ki KHushi ho mujhe nasib

main bhi usi mein KHush hun jo un ki KHushi hai ye

barbaad ho gaya hun jahan luT gaya hun main

koi mujhe batao ki kis ki gali hai ye

shayad ki aap yunhi meri baat puchh len

samjhe bhi aap kuchh sabab-e-KHamushi hai ye

mujh se nazar mili hai to mujh ko sanbhaaliye

banda-nawaz pahle-pahal main ne pi hai ye

kya dekhte ho hashr mein ek dad-KHwah ko

jo be-gunah qatl hua tha wahi hai ye

han han satao tum kisi iza-pasand ko

har chand dushmani hai magar dosti hai ye

meri taraf hai ab na tawajjoh na iltifat

zalim ne zabt-e-gham ki mujhe dad di hai ye

wo kah rahe hain bazm mein 'nudrat' ko dekh kar

hum is ko jaante hain baDa fitrati hai ye