waraftagi si rahti thi sham-o-sahar mujhe

vāraftagī sī rahtī thī shām-o-sahar mujhe

yaad aa.e kyā zamāne tumheñ dekh kar mujhe

guzrā jo us dayār se maiñ muddatoñ ke baa'd

hairat se dekhne lage dīvār-o-dar mujhe

ik hādisa hai rabt-e-dil-o-jāñ ke bāvajūd

merī ḳhabar hai un ko na un kī ḳhabar mujhe

ik din uThī na vo nigah-e-zīst-āfrīñ

din aa ga.e ye baiThe sar-e-rahguzar mujhe

kitne badal ga.e ho badaltī rutoñ ke saath

tum kar ke vaqf-e-mausam-e-chashmān-e-tar mujhe

ġhurbat kī shaam shām-e-lahū meñ Dubo gayā

milnā ba-chashm-e-nam tirā shām-e-safar mujhe

ik dhyān thā ki aayā mujhe tā-sahar 'bashīr'

ik iztirāb thā ki rahā rāt-bhar mujhe

waraftagi si rahti thi sham-o-sahar mujhe

yaad aae kya zamane tumhein dekh kar mujhe

guzra jo us dayar se main muddaton ke ba'd

hairat se dekhne lage diwar-o-dar mujhe

ek hadisa hai rabt-e-dil-o-jaan ke bawajud

meri KHabar hai un ko na un ki KHabar mujhe

ek din uThi na wo nigah-e-zist-afrin

din aa gae ye baiThe sar-e-rahguzar mujhe

kitne badal gae ho badalti ruton ke sath

tum kar ke waqf-e-mausam-e-chashman-e-tar mujhe

ghurbat ki sham sham-e-lahu mein Dubo gaya

milna ba-chashm-e-nam tera sham-e-safar mujhe

ek dhyan tha ki aaya mujhe ta-sahar 'bashir'

ek iztirab tha ki raha raat-bhar mujhe