waste jitne the sab wahm-o-yaqin ne chhoDe

vāste jitne the sab vahm-o-yaqīñ ne chhoḌe

āsmāñ sar se haTā paañv zamīñ ne chhoḌe

kaun thā kyuuñ na rahā kaise kareñ us kā pata

apne dukh bhī to makāñ meñ na makīñ ne chhoḌe

ḳhilqat-e-shahr na maanī mirā mulhid honā

varna shoshe to bahut mufti-e-dīñ ne chhoḌe

ham na āġhāz ke mujrim the na anjām ke haiñ

haath meñ haath liye tum ne tumhīñ ne chhoḌe

ḳhvāb kā ek parinda bhī na ta.abīr huā

jis qadar tiir gumāñ meñ the yaqīñ ne chhoḌe

vasl ke saikḌoñ va.adoñ se bhī maddham na hue

dil pe jo naqsh tirī ek nahīñ ne chhoḌe

paañv jamte haiñ kahīñ par na 'nazar' ruktī hai

haath jab se mire ik dast-e-hasīñ ne chhoḌe

waste jitne the sab wahm-o-yaqin ne chhoDe

aasman sar se haTa panw zamin ne chhoDe

kaun tha kyun na raha kaise karen us ka pata

apne dukh bhi to makan mein na makin ne chhoDe

KHilqat-e-shahr na mani mera mulhid hona

warna shoshe to bahut mufti-e-din ne chhoDe

hum na aaghaz ke mujrim the na anjam ke hain

hath mein hath liye tum ne tumhin ne chhoDe

KHwab ka ek parinda bhi na tabir hua

jis qadar tir guman mein the yaqin ne chhoDe

wasl ke saikDon wadon se bhi maddham na hue

dil pe jo naqsh teri ek nahin ne chhoDe

panw jamte hain kahin par na 'nazar' rukti hai

hath jab se mere ek dast-e-hasin ne chhoDe