wafa ka nam hamesha zaban par rakkha

vafā kā naam hamesha zabān par rakkhā

ye baar ham ne faqat apnī jaan par rakkhā

yaqīñ kā phuul na shāḳh-e-gumān par rakhā

ki ham ne ḳhud ko sadā ik nishān par rakkhā

ye kaun chupke se dhaḌkā gayā hai raat kā dil

ye phuul kis ne fasīl-e-makān par rakkhā

hamāre baad hamārī ġhazal ko logoñ ne

hadīs-e-ishq kī sūrat zabān par rakkhā

shikan paḌī na kabhī hausle ke māthe par

nazar ko ham ne sadā āsmān par rakkhā

paroñ ke zor meñ pinhāñ hai manziloñ kā surāġh

isī ḳhayāl ne 'zāhid' uḌaan par rakkhā

wafa ka nam hamesha zaban par rakkha

ye bar hum ne faqat apni jaan par rakkha

yaqin ka phul na shaKH-e-guman par rakha

ki hum ne KHud ko sada ek nishan par rakkha

ye kaun chupke se dhaDka gaya hai raat ka dil

ye phul kis ne fasil-e-makan par rakkha

hamare baad hamari ghazal ko logon ne

hadis-e-ishq ki surat zaban par rakkha

shikan paDi na kabhi hausle ke mathe par

nazar ko hum ne sada aasman par rakkha

paron ke zor mein pinhan hai manzilon ka suragh

isi KHayal ne 'zahid' uDan par rakkha