wafa ka shauq ye kis intiha mein le aaya

vafā kā shauq ye kis intihā meñ le aayā

kuchh aur daaġh maiñ apnī qabā meñ le aayā

mire mizāj mire hausle kī baat na kar

maiñ ḳhud charāġh jalā kar havā meñ le aayā

dhanak libās ghaTā zulf dhuup dhuup badan

tumhārā milnā mujhe kis fazā meñ le aayā

vo ek ashk jise rā.egāñ samajhte the

qubūliyat kā sharaf vo duā meñ le aayā

falak ko chhoḌ ke ham dar-ba-dar na the 'shahbāz'

zamīñ se TūTnā ham ko ḳhalā meñ le aayā

wafa ka shauq ye kis intiha mein le aaya

kuchh aur dagh main apni qaba mein le aaya

mere mizaj mere hausle ki baat na kar

main KHud charagh jala kar hawa mein le aaya

dhanak libas ghaTa zulf dhup dhup badan

tumhaara milna mujhe kis faza mein le aaya

wo ek ashk jise raegan samajhte the

qubuliyat ka sharaf wo dua mein le aaya

falak ko chhoD ke hum dar-ba-dar na the 'shahbaz'

zamin se TuTna hum ko KHala mein le aaya