wafa karna wafa-na-ashna ke sath bhi rahna

vafā karnā vafā-nā-āshnā ke saath bhī rahnā

charāġh-e-zindagī le kar havā ke saath bhī rahnā

shikast-e-shīsha-e-dil par bajā.e ashk-afshānī

kabhī ai chashm-e-tar dast-e-duā ke saath bhī rahnā

mahaknā bo.e gul ban kar kabhī sehn-e-gulistāñ meñ

kabhī sar-gashta āvāra sabā ke saath bhī rahnā

muhīt-e-āb-o-gil meñ jalva-farmā.ī ba-har-manzar

nihāñ nazroñ se bhī dil kī sadā ke saath bhī rahnā

parastish bhī butān-e-ārzū kī roz-o-shab zāhid

kabhī mardān-e-haq ahl-e-safā ke saath bhī rahnā

ye kyā hai duur hī se pursish-e-ahvāl kī zahmat

sharīk-e-ranj-o-rāhat ho to aa ke saath bhī rahnā

hai tauqīr-e-mohabbat farz arbāb-e-mohabbat par

uThānā naaz bhī lekin anā ke saath bhī rahnā

shu.ūr-e-rah-navardī is qadar lāzim hai rahrav par

ravish par apnī chalnā rahnumā ke saath bhī rahnā

ye duniyā kam nahīñ hai vādī-e-pur-ḳhār se 'at.har'

guzarnā is se hai dāman bachā ke saath bhī rahnā

wafa karna wafa-na-ashna ke sath bhi rahna

charagh-e-zindagi le kar hawa ke sath bhi rahna

shikast-e-shisha-e-dil par bajae ashk-afshani

kabhi ai chashm-e-tar dast-e-dua ke sath bhi rahna

mahakna boe gul ban kar kabhi sehn-e-gulistan mein

kabhi sar-gashta aawara saba ke sath bhi rahna

muhit-e-ab-o-gil mein jalwa-farmai ba-har-manzar

nihan nazron se bhi dil ki sada ke sath bhi rahna

parastish bhi butan-e-arzu ki roz-o-shab zahid

kabhi mardan-e-haq ahl-e-safa ke sath bhi rahna

ye kya hai dur hi se pursish-e-ahwal ki zahmat

sharik-e-ranj-o-rahat ho to aa ke sath bhi rahna

hai tauqir-e-mohabbat farz arbab-e-mohabbat par

uThana naz bhi lekin ana ke sath bhi rahna

shuur-e-rah-nawardi is qadar lazim hai rahraw par

rawish par apni chalna rahnuma ke sath bhi rahna

ye duniya kam nahin hai wadi-e-pur-KHar se 'athar'

guzarna is se hai daman bacha ke sath bhi rahna